Aqtóbede ýchaskelik beket ashylyp, polıtsııa qyzmetkerlerine 27 kólik tabystaldy
Óńir basshysy Eraly Toǵjanov polıtseılerge Hyundai markaly 27 jańa qyzmettik avtokóliktiń kiltin tabys etti. Jumysta joǵary nátıjege qol jetkizgen polıtseıler oblys ákiminiń alǵys hattarymen marapattaldy.
«Qazaqstandyq polıtsııa óziniń qurylǵan kúninen bastap qoǵamdyq tártip pen azamattardyń qaýipsizdigin qamtamasyz etý boıynsha alǵa qoıǵan mindetterin tabysty júzege asyryp jatyr. Bizdiń oblysta polıtsııa departamentiniń materıaldyq-tehnıkalyq bazasyn jaqsartý úshin barlyq jaǵdaı jasalǵan. Sońǵy úsh jylda Aqtóbe oblysy Polıtsııa departamentine 37,6 mlrd teńgeden astam qarjy bólinip, ótken jyly 12 avtokólik alynǵan bolsa, bıylǵy jarty jyldyń ishinde 27 avtokólik tabystaldy. Jalpy, polıtsııa departamentiniń materıaldyq-tehnıkalyq bazasynyń jaraqtandyrylýy ótken jylmen salystyrǵanda 30%-ǵa ósip otyr. Jyldan-jylǵa polıtsııa qyzmetkerleriniń jumysynyń tıimdiligi artyp keledi. Bul qylmys deńgeıiniń tómendeýinen kórinedi», - dedi Eraly Toǵjanov.
Aqtóbe qalasynyń Eset batyr turǵyn alabynda jańa servıstik polıtsııa pýnkti ashyldy. Munda azamattardy qabyldaý úshin barlyq jaǵdaı jasalǵan. Sonyń ishinde eriktiler kabıneti, ana men bala bólmesi jabdyqtalǵan. Ýchaskelik ınspektorlarmen qatar kámeletke tolmaǵandar isteri jónindegi ınspektorlardyń, kóshi-qon qyzmeti, ákimshilik tájirıbe, probatsııa qyzmetkerleriniń jumys oryndary da qarastyrylǵan. Múmkindigi shekteýli adamdar úshin kedergisiz qozǵalýǵa jaǵdaı jasalǵan. Pýnkt beınebaqylaý kameralarymen jabdyqtalǵan.
Ýchaskelik polıtseıler birneshe aýmaqtyń beınekameralaryna qosyla alady. Bul qylmys pen quqyq buzýshylyq tirkelse, jedel áreket etýge múmkindik beredi.
«Servıstik polıtsııa qyzmeti halyqqa jaqyn bolýy úshin salyndy. Bul – birinshi nysan. Endi shahardaǵy Batys-2 shaǵyn aýdanynda servıstik polıtsııa pýnktin ashamyz», - dedi oblystyq PD bastyǵy Abaı Júsipov.
Aıta keteıik, oblysta 380 patrýldik polıtsııa qyzmetkeri bar. Olarǵa 120-dan astam avtokólik berilgen.