Aqtóbede turmystyq nesıeni óteı almaǵan 55 myń adamnyń ósimaqysy keshirildi
Aqtóbe turǵyndary nesıeniń belgili bir bóligi ótelgenin SMS habarlama arqyly bilip otyr. Máselen, turmystyq, kepilsiz nesıe alǵan 25 myń adamnyń 4,6 mıllıard teńgesi óteldi. Qaryzy óteletin adamdar sanatyna kópbalaly, asyraýshysynan aıyrylyp, tólem alyp otyrǵan otbasy, múgedek bala asyrap otyrǵandar, 18 jastan asqan múgedekterdi baǵatyndar men memlekettik ataýly áleýmettik kómek alatyndar, ata-ananyń qamqorlyǵynsyz qalǵandar kiredi.
«Sonymen qatar turmystyq nesıe alǵan kez kelgen azamattyń aıyppuly, ósimaqysy keshirildi. Qazirgi kezde Aqtóbe oblysy boıynsha 55 myń adamnyń 1,3 mıllıard teńgesi shegerildi. Eki jaǵdaıda da bankke, basqa memlekettik organdarǵa barýdyń qajeti joq. Bári ortalyqtandyrylǵan, bankter óz klıentterine SMS jiberip jatyr», - dedi QR Ulttyq banki Aqtóbe oblystyq fılıaly dırektorynyń orynbasary Danat Seıilov.
Nesıeni óteý týraly bilý úshin bankke barýdyń qajeti joq. Tek kútý qajet. Eger otbasyndaǵy anasynyń qaryzy ótelip, ákesiniki sol sol kúıi qalsa, AHAJ bólimine nemese HQKO barý kerek.
«Májiliste «Bank jáne bank qyzmeti týraly» zań jobasy jatyr. Aldaǵy ýaqytta tabysy kúnkóris deńgeıine jetpeıtin adamdarǵa nesıe berilmeıdi. Sonymen qatar nesıe tólenbeı qalǵan kezde ósimaqy qosý tek 90 kúnmen shekteledi. Sol 90 kúnnen soń eshqandaı ósimaqy eseptelmeıdi», - dedi Danat Seıilov.