Aqtóbede tún ortasynda jas kelinshek 5 aılyq balasyn kóshede umytyp ketken

AQTÓBE. QazAqparat – Aqtóbe qalasynyń turǵyny kóshedegi oryndyqtan bes aılyq balany taýyp aldy. Ony anasy umytyp ketken, dep habarlaıdy QazAqparat tilshisi.

Búgin túngi saǵat 1:00 shamasynda Aqtóbe qalasyndaǵy №3 polıtsııa bóliminiń kezekshi bólimine turǵyn habarlasyp, bes aılyq bala kóterip ákeldi. Oblystyq PD baspasóz qyzmetiniń habarlaýynsha, ony turǵyn qaladaǵy 8-naýryz kóshesinde ornalasqan kópqabatty úılerdiń biriniń aýlasynan taýyp alǵan. Bala oryndyqta jylap jatqan.

«Qalalyq ıývenaldy polıtsııa tobynyń bastyǵy Botakoz Jalekeshovanyń aıtýynsha, eki tanys kelinshek bir-birin kóshede kórip qalǵan. Az kem áńgimeden soń áıeldiń mas kúıinde júrgenin sezgen aqtóbelik kelinshek qoshtasqan kezde qaıta burylyp, artyna qaraıdy. Sol kezde oryndyqtaǵy sómkeniń janynda jylap jatqan balany da kóredi. Ol balany alyp, polıtsııaǵa tapsyrǵan», - dep habarlady oblystyq PD baspasóz qyzmeti.

Aıta keteıik, bala qazir «Úmit» balalar úıinde. Balany anasyna qaıta berý, bermeý máselesin qala ákimdigi janyndaǵy kámeletke tolmaǵandardyń quqyǵyn qorǵaý jónindegi komıssııa sheshedi.