Aqtóbede tozyǵy jetken jylý qubyrlary almastyryldy

AQTÓBE. QazAqparat - Aqtóbede jylý taratý mekemesi tozyǵy jetken jylý qubyrlaryn almastyrdy. Qubyr aýystyrý, qazandyq qurylysyna halyqaralyq qarjy uıymynan nesıe alyndy, dep habarlaıdy QazAqparat tilshisi.

Aqtóbe jylý maýsymyna daıyndyqty pysyqtady. Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń Aqtóbe oblysy boıynsha departamenti jaz boıy qubyr aýystyrǵan «Transenergo» AQ jumysymen tanysyp, aldaǵy josparlaryn bildi.

Máselen, 2015-2020 jyldary ınvestıtsııalyq baǵdarlamaǵa sáıkes 7,6 mıllıard teńge bólinip, jóndeý júrgiziledi. Sonymen qatar, 2017-2018 jyldary Eýropalyq qaıta qurý jáne damý bankinen 3,1 mıllıard teńge nesıe alady. Bul qarjyǵa qazandyqtardy, jylý jelilerin qaıta qurý jáne modeldeýdiń gıdravlıkalyq baǵdarlamasy jasalǵan.

«Jóndeý jumystary kásiporynnyń energııa qory shyǵynyn 25,9 paıyzdan 18,8 paıyzǵa deıin, negizgi qural tozýynyń tómendeýin 68,5 paıyzdan  54,9 % deıin azaıtady. Ekonomıkalyq tıimdilik 91,3 mln teńgeni, sonyń ishinde shyǵyn kólemin tómendetýden 25,9 mln teńgeni qurady»,- dep habarlady «Aqtóbe aqparat» ortalyǵy.

Bıyl tozǵan tehnıkany jańartýǵa 63 mıllıon teńge bólindi.