Aqtóbede tótenshe jaǵdaılardyń aldyn alý komıssııasy shuǵyl jıyn ótkizdi

<p>AQTÓBE. KAZINFORM - Aqtóbede tótenshe jaǵdaılardyń aldyn alý jáne joıý jónindegi komıssııanyń kezekten tys otyrysyn ótti.</p>

Komıssııa otyrysyna polıtsııa, tótenshe jaǵdaılar departamenti, «Qazgıdromet» mekemesi men oblystyq basqarmalardyń basshylary qatysty.

Aqtóbe oblystyq Tótenshe jaǵdaılar departamentiniń basshysy Nurǵalı Júnisovtiń aıtýynsha, naýryzdan bastap barlyq jeke quram joǵary daıyndyq rejımine aýystyrylǵan. «Qazgıdromettiń» derekterine súıengen tótenshe jaǵdaılar qyzmeti Yrǵyz, Muǵaljar jáne Shalqar aýdandarynda dalalyq qar tez erip, eldi mekenderdi, joldardy sý basý qaýpi joǵary ekenin aıtty. 

- Kúni keshe respýblıkalyq mańyzy bar «Qandyaǵash-Embi-Shalqar-Yrǵyz» avtojolynyń 194 shaqyrymynda erigen qar sýy joldyń tómen ýchaskesin sý basty. Atalǵan ýchaskede sý ótkizý qubyry joq. Budan ózge, oblystyń sý tasqyny qaýpi bar ýchaskelerin zerdeleý barysynda respýblıkalyq mańyzy bar «Qarabutaq-Komsomol-Qostanaı» avtojolynyń 27-shaqyrymyndaǵy kópirdi jóndeý, sondaı-aq 87-shaqyrymyndaǵy sý ótkizý qubyryn ornatý qajettiligi anyqtaldy, - dedi TJD basshysy Nurǵalı Júnisov. 

Foto: Aqtóbe oblysy ákiminiń baspasóz qyzmeti

Aımaq basshysy Ashat Shaharov Aqtóbe qalasy, Yrǵyz, Áıteke bı, Qobda jáne Temir aýdandarynyń ákimderi, basqarma basshylary, TJD-men birlese, óz aýmaqtaryndaǵy ózenderde muz jarý jumystaryn jedeldetýdi tapsyrdy. Sondaı-aq oblystyq mańyzy bar joldardaǵy kópirler men sý ótkizý qubyrlaryn tazartý, qar shyǵarý jumystaryn toqtatpaýdy eskertti. 

- Bergen esepterińiz ben ár aıtqan sózderińiz isterińizben saı bolsyn. Aldymyzda merekeler bar, biraq, mereke-mereke dep, sý tasqyny ótip ketedi degen túsinik bolmaýy tıis. Kúshtik qurylymdar, shuǵyl den qoıý jasaǵy quryldy. Desek te, bosańsymaı, saqtyq sharalaryna laıyqty deńgeıde nazar aýdarý qajet, - dep atap ótti Ashat Shaharov.