Aqtóbede Tólegen Aıbergenov pen Shámshi Qaldaıaqovqa eskertkish ornatyldy
Aqtóbede «Ádebıet. Rýh. Qoǵam» atty eki kúndik respýblıkalyq ádebı forým ótti. Oǵan Jazýshylar odaǵynyń tóraǵasy Ulyqbek Esdáýlet, aqyn Elena Ábdihalyqova, aqyn Baýyrjan Jaqyp, QR Jazýshylar odaǵynyń múshesi Mereke Qulkenov, kompozıtor Qurmanáli Qaldybek, Mádenıet jáne sport mınıstrliginiń ókilderi qatysty.
«Men sizderdi Qazaqstan Respýblıkasy Táýelsizdiginiń 30 jyldyǵyn merekeleý qarsańynda, «Rýhanı jańǵyrý« baǵdarlamasy aıasynda uıymdastyrylǵan dástúrli «Ádebıet. Rýh. Qoǵam« forýmynda kórgenime qýanyshtymyn. «Alash« qozǵalysynyń kóshbasshysy Ahmet Baıtursynovtyń «óz tilinde sóıleıtin jáne óz ádebıeti bar halyq qana derbes ómirge úmitker bola alatynyn eshqashan umytpaýymyz kerek« degen sózin este ustasaq, forýmnyń basty maqsaty qazaq ádebıetinde eleýli iz qaldyrǵan Aqtóbe óńiriniń kórnekti tulǵalarynyń esimderin tanymal etý. Sondaı - aq jańa talanttardy anyqtaý bolyp tabylady», - dedi oblys ákimi Ońdasyn Orazalın. Sońǵy jyldary Aqtóbede Altyn Orda dáýiriniń qolbasshysy jáne memleket qaıratkeri Er Edigeniń, uly oıshyl Abaı Qunanbaevtyń eskertkishteri ashyldy.
Kıeli nysandar, onyń ishinde Abat Baıtaq, Han molasy, Dosjan haziret keseneleri jóndeldi. Eki jyl buryn Temir aýdanyndaǵy Tasqopa qorymynan tabylǵan Altyn adamnyń kıimderi qalpyna keltirildi. Belgili ǵalymdar men qoǵam qaıratkerleriniń qatysýymen ǵylymı-praktıkalyq konferentsııalar ótkizildi. Aqtóbe oblysynan shyqqan ataqty aqyndar men jazýshylardyń úzdik shyǵarmalarynyń jınaǵy shyǵaryldy. Al eki kúndik forým aıasynda «Edige degen er eken» atty respýblıkalyq jyrshylar baıqaýy, Tabyldy Dosymov atyndaǵy bard ánderin oryndaýshylardyń respýblıkalyq konkýrsy jáne basqa da is-sharalar ótti. Sonymen qatar respýblıkalyq ádebı baıqaýdyń 10 nomınatsııa boıynsha jeńimpazdary marapattaldy. Olarǵa Tólegen Aıbergenov, Saǵı Jıenbaev, Ótejan Nurǵalıev, Tobyq Jarmaǵambetov, Qajyǵalı Muhambetqalıuly, Tahaýı Ahtanov, Bákir Tájibaev, Úmbetbaı Ýaıdın, Qýandyq Shańǵytbaev, Іztaı Mámbetov sııaqty shyǵarmalary qazaq ádebıetiniń klassıkasyna engen kórnekti aqtóbelik aqyndar men jazýshylar atyndaǵy stıpendııalar tabys etildi.
Sonymen birge kompozıtor Shámshi Qaldaıaqov pen aqyn Tólegen Aıbergenovke arnalǵan eskertkishterdiń ashylý saltanaty ótti. Oǵan Shámshi Qaldaıaqovtyń ápkesi Raıhan Dombaeva jáne aqyn Tólegen Aıbergenovtiń qyzy Mahabbat Aıbergenova qatysty. Eskertkishter qala ortalyǵynda – aǵaıyndy Jubanovtar kóshesi boıyndaǵy Ǵashyqtar alleıasynda ornalasqan. Tólegen Aıbergenov eskertkish bıýstiniń bıiktigi - 3,2 metr. Shámshi Qaldaıaqovtyń eskertkishi kompozıtordyń qolyna mýzykalyq aspapty alǵan kúıi oryndyqqa otyrǵany beınelegen.