Aqtóbede tóbeles bolyp, bir adam aýrýhanada kóz jumdy

<p>AQTÓBE. KAZINFORM — Aqtóbede 18-22 jastaǵy jigitter tóbelesip, bir adam aýrýhananyń jansaqtaý bóliminde kóz jumdy.</p>

Oqıǵa mamyrdyń 27-nen 28-ine qaraǵan túni boldy.

Oblystyq PD baspasóz qyzmetiniń habarlaýynsha, Aqtóbe qalasyndaǵy aýrýhanaǵa oq jáne pyshaq jaraqatyn alǵan birneshe adam jetkizilgen.  

18-22 jas aralyǵyndaǵy jigitter Aqtóbe qalasy Mal bazary aýmaǵynda tóbelesken. 

— Aýrýhanaǵa jetkizilgenderdiń biri alǵan pyshaq jaraqatynan reanımatsııa bólimshesinde qaıtys boldy. Polıtsııa osy qylmysty jasady degen kúdikpen tórt adamdy «izin sýytpaı» anyqtap, ustady. Kúdiktiler ýaqytsha ustaý ızolıatoryna qamaldy. Kisi óltirý jáne buzaqylyq derekteri boıynsha sotqa deıingi tergep-tekserý bastaldy. Qylmystyq isti tergeý barysy Aqtóbe oblysy polıtsııa departamenti bastyǵynyń jeke baqylaýynda, — dep habarlady Aqtóbe oblystyq PD baspasóz qyzmetiniń jetekshisi Erbolat Sarqulov.