Aqtóbede terrorızmdi nasıhattaǵan Reseı azamaty 8 jylǵa bas bostandyǵynan aıyryldy

AQTÓBE. QazAqparat - Aqtóbe oblystyq qylmystyq ister jónindegi mamandandyrylǵan aýdanaralyq sotynda 32 jastaǵy Álimjan Turmanovqa sot úkimi shyqty. Ol terrorızmdi nasıhattap, top qurǵany úshin aıyptaldy, dep habarlaıdy QazAqparat tilshisi.

Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Á.Turmanovqa qatysty is jabyq ótti.

Sottalýshyǵa Qylmystyq kodekstiń «Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý», «Terrorızmdi nasıhattaý nemese terrorızm aktisin jasaýǵa jarııa túrde shaqyrý», «Terrorıstik top qurý, oǵan basshylyq etý jáne onyń áreketine qatysý» baptary boıynsha aıyp taǵyldy. Búgin úkim ashyq oqyldy.

«1986 jyly týǵan Álimjan Turmanov buryn sottalmaǵan, ajyrasqan, jumys istemeıdi. Ol Reseı azamaty. Turǵylyqty jeri - Orynbor oblysynyń ıAsnenskıı aýdany, Alasaı aýyly. 2018 jyldyń 11 qyrkúıeginen beri qamaýda otyr. Á.Turmanov Qylmystyq kodekstiń «Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý», «Terrorızmdi nasıhattaý nemese terrorızm aktisin jasaýǵa jarııa túrde shaqyrý», «Terrorıstik top qurý, oǵan basshylyq etý jáne onyń áreketine qatysý» baptary boıynsha aıypty dep tanyp, 8 jylǵa bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń qaýipsizdigi joǵary mekemesinde ótesin», - dedi sýdıa A.Sabyrov.

Sot otyrysy kezinde oqıǵanyń mán-jaıy tolyq aıtylmady.