Aqtóbede tergeý ızolıatorynda óz-ózine qol jumsaǵan sottalýshynyń isi qaralyp jatyr
Oqıǵa bıyl naýryz aıynda boldy. Onda anasy men balasy ólip, oqýshy qyz tiri qaldy. Búgin Aqtóbe oblystyq qylmystyq ister jónindegi mamandandyrylǵan aýdanaralyq sotynda is qarala bastady. Sottalýshy Á.Eleýovke syrttaı aıyp taǵyldy.
«Álisher Eleýovke Qylmystyq kodekstiń 192-baby 3-bóligi 4-tarmaǵy, 99-baby 2-bóligi 1 jáne 14 tarmaǵy, 24-baby 3 bóligimen aıyp taǵyldy. 2023 jyldyń 28 naýryzy kúni saǵat 22:30-da Eleýov jumystan shyǵyp, syra alady. Keıin doner daıyndaıtyn orynǵa baryp, doner jep, syra ishedi. Mas kúıinde ol aqshasy joq ekenin biledi. Sol kezde qaraqshylyq jasaý oıyna keledi. Sot aldy tergeý kezinde anyqtalmaǵan kesip-tesetin pyshaqqa uqsas zatty alyp, adam izdeıdi. Turǵyn úı aýlalarynda júredi. 2023 jyldyń 29 naýryzy kúni saǵat 02:20-da Eleýov mas kúıinde Jeńis kóshesindegi úı janynan ótip bara jatyp, ashyq turǵan balkondy kóredi. Eleýov oıyn iske asyrmaq bolyp, gaz qubyry arqyly balkonǵa kiredi. Páterge kirip, baǵaly zat, aqsha izdeıdi. Ol adamdar uıyqtap jatqanyn kóre tura solaı jasady. Saǵat shamamen 02:25-te E.Getına oıanyp ketip, páterinde júrgen bógde adamdy kóredi. Sol kezde sottalýshy birden bas salyp, kesip-tesetin zatty birneshe ret suǵyp alady. Jábirlenýshi kóp qan ketip, oqıǵa ornynda qaza tapty. Sol kezde shamamen saǵat 02:30-da anasynyń daýysynan balasy oıanyp ketedi. Eleýov balasyna tarpa bas salyp, ony da pyshaqtaıdy. Jábirlenýshi oqıǵa ornynda qaza tapty. Keıin saǵat 02:35-te qyz oıanady. Ol jerde jatqan aǵasyn kóredi. Úıde júrgen bógde adam qyzdan «Úıde basqa adam bar ma?» dep suraıdy. Eleýov jaýap ala almaǵan soń kámeletke tolmaǵandy óltirý úshin qylǵyndyra túsedi. Sonymen birge birneshe ret pyshaq suǵady. Onyń qımylsyz qalǵanyn kórip, ketip qalady. Saǵat 03:30-da qyz esin jıyp, sulq jatqan aǵasyn kórip, balalar bólmesindegi uıaly telefonyna barady. 03:35-te kóp qan joǵaltqan jábirlenýshi telefon soqqysy kelgenimen, saýsaǵy ıkemge kelmeıdi. Sol kezde telefonnyń blokqa qoıatyn núktesin alty ret basyp, SOS kómek suraý belgisin beredi. Qońyraý tótenshe jaǵdaılar qyzmetine túsip, jedel kómek kórsetildi», - dedi memlekettik aıyptaýshy Іlııas.
Sotta tiri qalǵan jábirlenýshiniń zańdy ókili E.Kaırıs isti toqtatýdy surady.
«Jıenim ony daýysynan tanydy. Іsti qaıtarýǵa, qaıta tergeýge kelispeımiz. Aıyptalýshynyń kinási tolyq dáleldendi. Páterde qan izi tabyldy. Biz istiń ári qaraı jalǵasqanyn qalamaımyz. Jalpy sommasy 30 mln teńge moraldyq-materıaldyq shyǵyn óteýdi suraımyz. Jasóspirimniń jaǵdaıy birqalypty. Qazir ájesiniń qasynda. Psıholog kómeginen ózi bas tartyp otyr», - dedi ol.
Sottalýshy Á.Eleýovtyń qorǵaýshylary bolsa qylmystyq isti qaıta tergeýge jiberýdi, qaıta saraptama taǵaıyndaýdy surady. Al sýdıa A.Balmuhanov zańda sottalýshy bolmasa, sotty toqtatý qarastyrylǵanyn aıtty.
Eske salsaq, anasy men ulynyń kisi qolynan qaza tapqany týraly aqparat polıtsııaǵa bıyl 29 naýryz kúni saǵat 5:30-da túsken. Al kúdikti birneshe kúnnen soń ustaldy.
Sot otyrysy jalǵasady.