Aqtóbede táýelsizdiktiń 30 jyldyǵyna arnalǵan qaıyrymdy ister marafony bastaldy
Aqtóbe qalasyndaǵy shańǵyroller trassasynda «Qaıyrymdy ister marafony» aktsııasy resmı túrde bastaldy.
Sharaǵa oblys ákimi Ońdasyn Orazalın, máslıhat depýtattary, úkimettik emes uıymdardyń basshylary, ataqty sportshylar, táýelsizdik qurdastary qatysty.
«Byltyr Eriktiler jylynyń jabylý saltanatynda Memleket basshysy Qasym-Jomart Kemeluly Toqaev «Qaıyrymdy ister» marafonyn ótkizýdi usynǵan bolatyn. Abaıdy mysalǵa keltirdi. Ol: ystyq qaırat, nurly aqyl, jyly júrek. Bul jaı sózder emes, eldi ıgi istermen bereke-birlikke shaqyrǵan zor úndeý dep qabyldaýymyz qajet. Sondyqtan búgin Prezıdentimiz kótergen ıgilikti bastama - «Qaıyrymdy ister» marafonymen táýelsizdigimizdiń 30 jyldyq mereıli kezeńiniń shymyldyǵyn ashyp otyrmyz. Buǵan azamattyq sektor men bıznes-qaýymdastyq ókilderiniń, memlekettik organdar men barsha belsendi azamattardyń qatysýy óte mańyzdy. Áleýmettik mańyzdy máselelerdi sheshýde memleket – qoǵam – bıznes ókilderi arasyndaǵy áriptestikke artylar senim zor. Mereıli toı jyly biz túrli saladaǵy ondaǵan iri jobany júzege asyrýdy josparlap otyrmyz»,- degen Ońdasyn Orazalın kópbalaly jáne az turmysy tómen otbasylarǵa kómek qolyn sozǵan metsenattarǵa alǵysyn bildirdi.
Qaıyrymdylyq marafony kezinde múmkindigi shekteýli 15 adamǵa «Shıpager» saýyqtyrý ortalyǵynda emdelýge joldama berildi.
Eriktiler uıymynyń basshylary táýelsizdik qurdastarynyń atynan jurtshylyqtan «Qaıyrymdylyq isteri» marafonyn qoldaýdy surap, qıyn jaǵdaıǵa tap bolǵan K.Meıramǵalıdiń otbasyna 400 myń teńge kólemindegi sertıfıkatty tabys etti.
Atalǵan qarajat osy otbasynyń basapanaly bolýy úshin bastapqy jarna retinde tólenetin bolady.
Sharada máslıhat depýtattary, qoǵamdyq uıym basshylary, eriktiler, sportshylar shańǵy jarysyna qatysty.