Aqtóbede tasqyn qaýpi bar aýdandardyń kartasy jasalady
Aqtóbede kóktemgi sý tasqyny kezeńine daıyndyq máseleleri boıynsha otyrys ótti.
«Jyl saıyn aýa raıynyń kúrt jylynýy jáne qardyń tez erýi kezinde sý tasqyny qaýpi kúsheıedi. Barlyǵy sý tasqyny kezeńine jan-jaqty ári tyńǵylyqty daıyndalmaýdyń saldary dep esepteımin. Sý tasqynyn boldyrmaý jáne onyń aldyn alý boıynsha jumystarǵa úlken jaýapkershilikpen qaraý kerek», - dep atap ótti óńir basshysy.
«Qazgıdromet» RMK Aqtóbe oblystyq fılıalynyń málimetinshe, byltyrǵa qaraǵanda bıyl qar kóp jaýdy. Topyraq qabatynyń qatý qalyńdyǵy 100 jetti.
Aqtóbe oblysy boıynsha Tótenshe jaǵdaılar departamenti ákimdikpen birlesip, jalpy sany 1 594 adam, 487 birlik tehnıka, syıymdylyǵy 14 myńnan asatyn 84 oryn, 26 shatyr daıyndady. Qazir óńirde 20 qaýipti ýchaskeni anyqtady. Onyń ishinde Aqtóbe qalasynda – 10, Oıyl aýdanynda – 4, Temir aýdanynda – 2, Áıteke bı, Alǵa jáne Mártók aýdandarynda bir-birden. Barlyq aýdannyń ákimderin muqııat tyńdaǵan oblys ákimi byltyrǵydaı jaǵdaıdyń qaıtalanbaýyn nyqtap tapsyrdy. Atap aıtsaq, 2022 jyly Muǵaljar, Qarǵaly, Alǵa, Baıǵanın, Oıyl jáne Qobda aýdandaryndaǵy respýblıkalyq, oblystyq jáne jergilikti mańyzy bar joldardy sý basýy, ıaǵnı, tasqyn sýynyń jol deńgeıinen asyp ketýine qatysty — 14 jaǵdaı, Baıǵanın, Oıyl, Qobda jáne Muǵaljar aýdandaryndaǵy respýblıkalyq jáne jergilikti mańyzy bar joldardy sý shaıyp ketýine qatysty 9 derek tirkelgen-di.
Jıyn sońynda Tótenshe jaǵdaılar departamenti men aýdan ákimderine barlyq problemalyq aımaqtardy baqylaýǵa alyp, jumysty jandandyrý, arnaıy tehnıkalar men ınertti materıaldardy qajetinshe daıyndaý tapsyryldy.
«Qysqa merzimde ár aýdan boıynsha Táýekelder kartasy jasalýǵa tıis. Sý tasqynynyń saldarymen kúresýden buryn aldyn alý sharalaryn iske asyrý kerek. Bul másele erekshe baqylaýda bolýy tıis. Ár aýdandaǵy jaǵdaıǵa udaıy monıtorıng jasalyp otyrylýy kerek», —dedi óńir basshysy.
Jıynnan keıin oblys ákimi Jińishke ózenin tazartý jumystarynyń barysymen tanysty.
FOTO: Aqtóbe oblysy ákiminiń baspasóz qyzmeti.