Aqtóbede tapshy mamandardy daıarlaýǵa bólingen grant ıeleriniń tizimi shyqty

AQTÓBE. QazAqparat - Aqtóbe oblysynda joǵary bilimdi mamandardy daıarlaýǵa bólingen grant ıeleri anyqtaldy, dep habarlaıdy QazAqparat.

Búgin Aqtóbe oblysy ákimi Eraly Toǵjanovtyń tóraǵalyǵymen 2023-2024 jańa oqý jylyna jergilikti bıýdjet qarajaty esebinen joǵary bilimi bar mamandardy daıarlaýǵa (bakalavr) grant taǵaıyndaý boıynsha komıssııa otyrysy ótip, bilim granty ıegerleri anyqtaldy.

Óńirde suranysqa ıe mamandyqtarǵa bólingen 38 orynǵa jalpy 63 úmitker qujat tapsyrdy.

Igerilmeı qalǵan grant oryndaryn (orys tili men ádebıet pániniń muǵalimderi, sý resýrstary men balyq sharýashylyǵy) konkýrstary joǵary jáne qajettiligi bar mamandyqtarǵa qosymsha bólý usynyldy.

Jergilikti atqarýshy organnyń memlekettik tapsyrysy boıynsha joǵary oqý ornyn bitirgen maman kadr tapshylyǵy oryn alǵan oblystaǵy kez kelgen jerge baryp, kelisimshart negizinde 5 jyldan kem emes ýaqyt jumys isteýi qajet.

38 grant ıesiniń tizimi myna siltemede jarııalanǵan.

Olar kórsetilgen joǵary oqý oryndaryna 25 tamyzǵa deıin qujat tapsyrýy kerek.