Aqtóbede tańerteńnen beri 4 jasar bala tabylmaı jatyr

AQTÓBE. QazAqparat - Aqtóbe qalasynda 4 jasar Danıl Ahýnov tabylmaı jatyr. Ol búgin tańerteń aýlada oınap júrgen jerinen joq bolyp ketti, dep habarlaıdy QazAqparat tilshisi.

Búgin saǵat 9:35-te Jedel basqarý ortalyǵynyń 102 telefonyna Aqtóbe qalasy Qazanǵap kóshesindegi №59 úıdiń aýlasynan 2018 jyly týǵan Ahýnov Danıl Artýrovıchtiń joǵalyp ketkeni týraly habarlama tústi. Ony izdeýge polıtsııamen qatar eriktiler jumyldyryldy.

«Boıy shamamen 120 sm, dene bitimi aryq, shashy qońyr tústi. Qyzǵylt sary tústi kúrte, ashyq kók tústi toqylǵan bas kıim, kók tústi kúderi aıaq kıimi bar. Balany izdeýge polıtsııanyń keshendi kúshteriniń jasaqtary, QR UU áskerı qyzmetshileri men eriktiler tartyldy.
Qandaı da bir aqparatqa ıe adamdardyń barlyǵynan 102 nómirine nemese 8771-785-1058 nómirine qońyraý shalýdy suraımyz», - dep habarlady oblystyq PD baspasóz qyzmetiniń jetekshisi Erbolat Sarqulov.

Foto: Aqtóbe oblysynyń PD baspasóz qyzmeti