Aqtóbede taǵy da qoqys polıgony órtenip jatyr

AQTÓBE. QazAqparat – Aqtóbedegi qoqys polıgonynan taǵy da órt shyqty. Qazir polıgonǵa jaýapty kompanııa men órt sóndirýshiler qum tósep jatyr, dep habarlaıdy QazAqparat tilshisi.

Qoqys polıgonyndaǵy órt búgin saǵat 10:40-ta tutanǵan.

Oblystyq TJD baspasóz qyzmeti «Tabys Aqtóbe» JShS-ne tıesili qatty turmystyq qaldyq polıgonynyń aýmaǵynda qoqys jáne qurǵaq shóp janyp jatqanyn habarlady.

«Sóndirý jumystaryna órt sóndirý bólimderi jáne «Tabys Aqtóbe» JShS-nen, Oman sharýashylyǵynan jalpy 46 qyzmetker men 21 birlik tehnıka jumyldyryldy. Qoqystyń byqsýyn joıý jáne qummen jabý jumystary júrgizilip jatyr»,- dep habarlady oblystyq TJD baspasóz qyzmeti.

Eske salsaq, osydan on kún buryn ǵana qoqys polıgony órtenip, ol kezde de qum tóseldi.

Qalalyq turǵyn úı-kommýnaldyq sharýashylyq bóliminiń uıymdastyrýymen órt sóndirý qyzmetiniń, «Tabys Aqtóbe» JShS jáne basqa da merdigerlerdiń arnaıy tehnıkalary tartyldy.

Qala ákimi túngi aýysymda jumys barysyn toqtatpaı, qosymsha kúsh tartý arqyly jappaı topyraq tógip, órt oshaqtaryn sóndirý týraly tapsyrma berdi.

«Bıyl órt oqıǵasy birneshe ret qaıtalanyp otyr. Muny turǵyndar jaqsy biledi. Bul polıgon 2007 jyly ashylyp, búginge deıin qoqys qabyldady. Óziniń qabyldaý múmkindigin aıaqtady dese de bolady», - dedi qala ákimi Azamat Beket.