Aqtóbede taǵy bir joldy sý basty
Aqtóbe oblysynda Baıǵanın, Temir, Qobda, Alǵa jáne Oıyl aýdandarynda qar tez erip, kópti ábigerge saldy. Buǵan deıin Baıǵanın aýdanynda kópirdi sý shaıyp, tórt aýylǵa qatynas shektelgen edi.
Búginde Oıyl-Qaıyńdy jolyn sý basty.
«Oıyl – Qaıyńdy avtojolynyń 7 shaqyrymynda erigen sý tasydy. Jol tósemesi qalpynda. Avtokólikter aınalma jolmen qatynaýda. 2022 jyly bul ýchaskede ortasha jóndeý jumystary bastaldy. Ony bıyl aıaqtaý josparlanyp otyr. Sondaı-aq, eki sý ótkizgish qubyrdy ornatý josparlanǵan. Oıyl aýdanyndaǵy jaǵdaı baqylaýda»,-dep habarlady Aqtóbe oblysy ákiminiń baspasóz qyzmeti.
Óńirde sý tasqynyna qarsy shtab jumys isteıdi.
«6 naýryzdan bastap Aqtóbe qalasy men oblys aýdandarynda kóshelerden, avtojoldardan jáne aýla aýmaqtarynan erigen qar sýyn sorý jáne burý boıynsha 1097 ótinim qabyldandy, barlyǵy der kezinde pysyqtaldy. 88 myń tekshe metrden astam erigen sý aıdaldy. 5,1 shaqyrym aryq tazartyldy, 3708 sharshy metr ınertti materıal ákelindi, 1 900 dana qap tóseldi. Oblystyń eldimekenderinen 512 myń tekshe metrden astam qar shyǵaryldy. Іs-sharalarǵa 138 assenızator, 142 birlik arnaıy tehnıka, 20 mobıldi brıgada, 650 adam jumyldyryldy. Qazir erekshe baqylaýda 4 ýchaske bar. Onda sý sorý jumystary júzege asyrylyp jatyr. Eldimekenderdi sý basý qaýpi joq»,-dep habarlady Aqtóbe oblysy ákiminiń baspasóz qyzmeti.