Aqtóbede taǵy bir máıittik donor otasy jasaldy
«Týǵan jer» forýmyna kelgen Ulttyq transplantologııa ortalyǵynyń dırektory Jaqsylyq Dosqalıev búgin baýyr aýystyrý otasyn jasady. Tańǵy saǵat 5:00-de bastalǵan ota tústen keıin aıaqtaldy. Aqtóbe medıtsınalyq ortalyǵynda ótken otany jergilikti dárigerler akademık Jaqsylyq Dosqalıevtiń kómegimen jasady. Bul óńirde ótken máıittik transplantatsııanyń ekinshi otasy bolǵanymen, baýyr almastyrý boıynsha alǵashqy operatsııa.
«Aqtóbe medıtsınalyq ortalyǵynda 47 jastaǵy er adamnyń baýyry aýystyryldy. Máıittik donor boıynsha baýyr aýystyrýdyń alǵashqy otasy jasalyp otyr. Donordyń kim bolǵany aıtylmaıdy. Bizge akademık Jaqsylyq Dosqalıev kómektesti. Ota sátti ótti. «Týǵan jer» forýmy aıasynda Aqtóbede taǵy bir ota jasalady. Ol erteń Ońtúsik Koreıadan kelgen dáriger Kvang Výng Lıdiń kómegimen ótedi»,- dedi Aqtóbe oblystyq densaýlyq saqtaý basqarmasynyń shtattan tys hırýrgi Erlan Sultangereev.
Eske salsaq, Aqtóbede koreıalyq dárigerlerdiń kómegimen 25 búırek, 9 baýyr aýystyrý otasy jasaldy .
Eske salaıyq, Aqtóbe oblysynda alǵashqy máıittik transplantatsııa búırekke jasalǵan bolatyn. Biraq aqtóbelik dárigerlerdiń qaıtys bolǵan Serikbolsyn Kósherbaıdyń qos búıregin ruqsatsyz alýyna qatysty keıin daý shyqqan edi. Jigittiń týǵan-týystary narazylyq bildirip, azamattyq aryz túsirdi. Keıin aryzdy qaıta alyp, is qysqartyldy.