Aqtóbede taǵy bir adam sýǵa batyp ketti
Oqıǵa 16-shilde kúni tirkeldi. Saǵat 10:45-te oblystyq TJ departamentiniń kezekshi-dıspetcherlik basqarý pýltine Aqtóbe oblysy Hromtaý aýdany Qyzylsý aýyldyq okrýgi Sarsaı aýyly mańyndaǵy Aleksandrovka sý qoımasynda er adamnyń sýǵa ketkeni týraly habar tústi. Ol tyıym salynǵan jerge sýǵa túsken.
«Nátıjesinde qutqarýshylardyń kúshimen 31 jastaǵy er adamnyń denesi 6 metr tereńdikten shyǵaryldy. Aqtóbe oblysynyń TJ departamenti sý aıdyndaryndaǵy qaýipsizdik erejelerin eske salady. Alkogol jáne esirtkiden mas bolǵan kúı̆inde sýǵa túsýge jáne shomylýǵa bolmaıdy. Tekserilmegen jáne jabdyqtalmaǵan aýmaqta súńgý qaýipti»,- dep habarlady oblystyq TJD baspasóz qyzmeti.
Eske salsaq, Aqtóbede qutqarýshylar 2 jáne 4 metr tereńdikten eki adamnyń denesin alyp shyqty. Qaıǵyly oqıǵanyń biri qalada, ekinshisi aýylda boldy. Qaladaǵy shaqyrtý ornyna qutqarýshylar dereý jetken kezde 27 jastaǵy aqtóbeliktiń jeke jaǵajaıda sýǵa ketkenin anyqtady. Onyń denesi jaǵadan 10 metr qashyqta 2 metr tereńdikten shyǵaryldy. Sondaı-aq, Muǵaljar aýdany Qumjarǵan aýyldyq okrýgine qarasty Sheńgelshi aýylynda Jem ózenine 34 jastaǵy er adam batyp ketti. Almaty oblysy Taldyqorǵan qalasy turǵynynyń denesi 4 metr tereńdikten shyǵaryldy.