Aqtóbede taǵy da jeńil kólik pen júk tıegen mashına soqtyǵysty

<p>AQTÓBE. KAZINFORM &ndash; Almatydan Máskeýge bara jatqan júk kóligi jol-kólik apaty kezinde aýdarylyp qaldy. Jeńil kólik júrgizýshisi túrli dene jaraqatyn alyp, aýrýhanaǵa jetkizildi.</p>

Jol-kólik apaty búgin saǵat shamamen 14:00-de Aqtóbe qalasyndaǵy Ońtústik aınalma jolda eki kólik soqtyǵysty. DAF jáne Toyota kóligi soqtyǵysyp, jeńil mashına júrgizýshisi aýrýhanaǵa tústi. Aqtóbe oblystyq PD Patrýldik polıtsııa batalony komandıriniń orynbasary Anýar Ibraevtiń aıtýynsha, jeńil kólik júrgizýshisi rýlge ıe bola almaı qalǵan.

«Jedel járdem oqıǵa ornyna baryp, 1 adamdy aýrýhanaǵa alyp ketti. 29 jastaǵy er adamǵa mıy shaıqaldy degen dıagnoz qoıyldy. Ol dárigerlerden keńes alǵan soń aýrýhanaǵa jatýdan bas tartty. Sonymen birge kólikte bolǵan 18 jastaǵy jigit aýrýhanaǵa barýdan bas tartty. Al 38 jastaǵy er adam dárigerge shaǵym aıtpady», - dep habarlady Aqtóbe oblystyq Densaýlyq saqtaý basqarmasynyń baspasóz qyzmeti.

Eske salsaq, osy aıda Aqtóbede júk kóligi men jeńil mashına soqtyǵysyp, birneshe jol-kólik apaty tirkeldi. Áıteke bı aýdanynan Mańǵystaýdaǵy fýtbol týrnırine bara jatqan balalar apatqa ushyrap, kólik ishinde bolǵan 8 adam mert boldy.

Statıstıkaǵa súıensek, jyl basynan beri óńirde 416 jol-kólik apaty boldy. Onda 94 adam kóz jumdy. Qazirgi kezde Samara-Shymkent tasjolynda qaýipsizdik úshin kezekshilik kúsheıtildi. Polıtsııa qyzmetkerleri ilesip júrýge kóshti.