Aqtóbede taǵy bir joldy sý shaıyp ketti

<p>AQTÓBE. KAZINFORM - Aqtóbe oblysy Shalqar aýdany Ulpan aýyly mańynda joldy sý shaıdy. Munda qum toly 300 qap tóselgenimen sýdy tolyq toqtatý múmkin bolmaǵan.</p>

Shalqar aýdany ákimdiginiń resmı paraqshasyndaǵy málimetke súıensek, respýblıkalyq mańyzy bar Qandyaǵash-Embi-Shalqar-Yrǵyz avtomobıl jolynyń 232 shaqyrymyndaǵy Ulpan aýylynyń tusynda qaýip kúsheıip, jol jıegin bekitý jumysy júrgizildi. Kúni buryn qapqa qum salyp, tóseldi. Alaıda qar tez erip, joldy shaıdy. 

- Oqıǵa ornyna Shalqar aýdanynyń ákimi Janbolat Jıdehanov pen aýdandyq polıtsııa bóliminiń bastyǵy Rınat Sataev arnaıy bardy. Jaǵdaı aýdan basshynyń tikeleı baqylaýynda. Atalǵan aýmaqta quzyrly mekeme tarapynan 300 qap qum tóselengen. Alaıda erigen qar sýynyń deńgeıiniń ósýi saldarynan joldy sý shaıý jaǵdaıy tirkeldi,- dep habarlady Shalqar aýdanynyń ákimdigi.

Bul aýmaqta №7 órt sóndirý bóliminen 4 adam, aýdandyq TJB 1 adam men 1 tehnıka, «Energosıstema» JShS Shalqar bólimshesinen 4 adam jáne 1 tehnıka, «Qazservıs» JShS-nen 12 adam men 4 tehnıka, jeke kásipkerlerden 4 adam men 4 tehnıka jumyldyryldylǵan. Sonymen birge temirjolshylar da kómekke bardy. Qazirgi kezde sý tasqynynyń saldaryn joıý jumysy júrgizilip jatyr. Shalqar aýdany ákimdigi atalǵan baǵyttaǵy jolǵa shyqpaýdy surady.

Eske salsaq, buǵan deıin Shalqar aýdanynyń Móńke aýyly mańynda joldy sý shaıdy.