Aqtóbede taǵy bir aýyl jańadan salynady

<p>AQTÓBE. KAZINFORM &ndash; Yrǵyz aýdany Nura aýylynyń halqy túgel kóshiriledi. Mundaǵy halyq qazir jer tańdap jatyr.</p>

Aqtóbe oblysy Yrǵyz aýdany Nura aýylynda barlyǵy 112 úıdiń 103-ine sý kirdi. Qazirgi kezde sý deńgeıi 3 metrge jetip qalǵan. Sýdyń qaıtatyn ýaqyty belgisiz. Sondyqtan mundaǵy aýyldy kóshirýge sheshim qabyldanyp, jer tańdaý jumysyna jergilikti turǵyndar qatysty. 

- Men 60 jyldan beri Nura aýylynda turamyn. 1972 jyly bóget buzylyp, sol jyly sýǵa ketken edik. Biraq mynadaı sý bolmady ol kezde. Men ózim birinshi ret kórip turmyn. Qazir aýyldy kóshirýge sheshim qabyldanyp jatyr eken. Biz jer tańdaýǵa keldik. Bizge úı salyp berse boldy. Qorany ózimiz salamyz. Bálkim qulaǵan úıimizdi ákelip qurylysqa paıdalanarmyz. Mol sýdy kórip turyp «sol jerge qaıta úı sal» dep aıta almaımyz,- dedi Nura aýylynyń turǵyny Aıbolat Sarmanov. 

Foto\vıdeo: Altynaı Saǵyndyqova/Kazinform

Nura aýylynda ortalyqtandyrylǵan aýyz sý boldy. Sonymen birge bir jyl buryn gaz berildi. Mundaǵy birneshe uıaly baılanys operatorynyń munarasy qoıylǵan. Jaryq ta ýaqytyly berildi. 

- Jańa aýyl da sol gaz qubyrynyń boıyna salynýy kerek dep oılaımyz. Sebebi mol aqsha bólinip, bir kezderi qubyr tartyldy. Jastar da úıdi, aýyldy qala úlgisinde saldy. Bir nusqasy – Saryoba tóbesi. Osy jerdiń janyndaǵy taǵy eki nusqa tańdaldy. Biz Nura aýylyn joıǵymyz kelmeıdi. Týyp-ósken jer ystyq,- dedi Aıbolat Sarmanov.

Qazirgi kezde 100-den astam úıdiń 20-30-y aýdan ortalyǵyna kóshý týraly oıyn da aıtyp jatyr. Onyń naqty sany belgisiz. Al keıbir turǵyn aýyl mańyna tigilgen shatyrdy panalap, alysqa uzamaǵan. 

Foto\vıdeo: Altynaı Saǵyndyqova/Kazinform

- Nura – týǵan jerim. Yrǵyz aýdanyna evakýatsııalaǵanymen, jyljymaly vagon bolǵan soń osy mańǵa qaıtyp keldim. Ózim ǵana emes, mal da osynda. Adam óz týǵan jerin qımaıdy eken. Bizge tek úı salyp berse bolady,- dedi aýyl turǵyny Temirbek Qulynbaev. 

Yrǵyz aýdany ákimdigi men Nura aýyly turǵyndarynyń kezdesýi Saryoba tóbesinde boldy. Bul jerde qorym bar. Jańa tańdalǵan jer eski aýyldan shamamen 13-14 shaqyrym qashyqta ornalasqan. 

Foto\vıdeo: Altynaı Saǵyndyqova/Kazinform

- Birinshi adamnyń amandyǵyn, densaýlyǵyn, ómirin saqtaıtyn jerdi tańdaý kerek. Yrǵyz aýdanyna eki merdiger keldi. Bizdiń mindetimiz – úı salynatyn jerdi anyqtaý. Sol úshin de Nura aýyly turǵyndarymen kezdesý bolyp jatyr. Mamyr aýylyndaǵy úılerdi bıik jerge salamyz. Belsherde de sondaı. Keıbiri basqa aýylǵa kóshýi múmkin. Qazir naqtylaý jumysy júredi. Barlyǵy 2-3 kúnde belgili bolady. Nura aýyly turǵyndarymen jıyn ótkizip, hattama toltyrylady. Qazir shamasy belgili, sondyqtan úı salý jumysy bastala beredi,- dedi Yrǵyz aýdanynyń ákimi Nurlan Qyzbergenov. 

Jańa joba boıynsha aýyldyń eni men uzynyǵy 1 shaqyrym bolady. Úımen qatar qora salýǵa jer bólinýi múmkin. 

Foto\vıdeo: Altynaı Saǵyndyqova/Kazinform

Aıta keteıik, Oıyl aýdanynyń Ekpetal aýylyndaǵy halyq túgel aýdan ortalyǵyna kóshiriledi.