Aqtóbede tabysty arttyrýǵa baǵyttalǵan 2 myńnan astam joba iske asýda
«Halyq tabysyn arttyrýǵa arnalǵan «Aýyl amanaty» jobasy iske asyp jatyr. Maqsat - óńirdiń azyq-túlik qaýipsizdigin qamtamasyz etý, aýyldyq eldi mekenderde jańa jumys oryndaryn qurý jáne mal men qus sanyn arttyrý. Sondaı-aq, shaǵyn kásipkerlikti damytý. Qazir «Aýyl amanaty» boıynsha oblystaǵy 12 aýdannyń 24 aýyldyq okrýginde 2 myńnan astam joba iske asyrylýda. Jobany qarjylandyrýǵa bıyl respýblıkalyq bıýdjetten 3 mlrd teńge bólindi. Kelesi jyly bólinetin qarajat kólemi ulǵaıady. Joba iske asyp jatqan aýyldardan kelesi áleýmettik-ekonomıkalyq kórsetkishter kútiledi. Jumyssyzdyq deńgeıi 41,4%-ǵa tómendeıdi, ataýly áleýmettik kómek alýshylardyń úlesi 49,3%-ǵa azaıady. Odan bólek, otbasynyń ortasha tabysy 192%-ǵa artady», - dedi Aqtóbe oblysynyń ákimi Eraly Toǵjanov elordada ótken «Aktobe Investment-2022» VII halyqaralyq ınvestıtsııalyq forýmda.
Ákimniń aıtýynsha, aqtóbelikter «Aýyl amanaty» jobasy aıasynda taýarlaı nesıe alýyna bolady.
«Jobada taýar nesıesi qarastyrylǵan. Mysaly, jobaǵa qatysýshy nesıege mal alady, keıin ony aqshalaı emes, mal basymen qaıtarady. Óńirdiń aýyl sharýashylyǵy óndirýshileri 6 myńǵa deıin mal basyn nesıege berýge daıyn», - deıdi ol.
Sondaı-aq, óńir basshysy bıyl qarashada elimizde alǵash ret shaǵyn jınaqty mektepterdi qoldaýǵa baǵyttalǵan «BІLІM ALL» óńirlik jobasynyń iske qosylǵanyn tilge tıek etti.
«Memleket basshysynyń joǵary bilim berý júıesin qaıta reformalaý jónindegi tapsyrmasyn oryndaý aıasynda Q.Jubanov atyndaǵy Aqtóbe memlekettik ýnıversıtetiniń bazasynda Ulybrıtanııanyń jetekshi joǵary oqý orny Heriot-Watt University-niń fılıalyn ashý josparlanýda», - dedi E. Toǵjanov.
Aıta ketsek, ınvestıtsııalyq halyqaralyq forýmǵa elimizdegi keıbir shetel elshileri men sheteldik ınvestorlar qatysty.
«Biz Aqtóbede magıstraldyq elektr jelisin tsıfrlandyrýmen aınalysatyn kompanııanyń bolǵanyn qalaımyz. Tsıfrlandyrýsyz bolashaqta bıznesti damyta almaımyz. Tehnologııa damyǵan zamanda magıstraldyq elektr jelileri - bul energııa berýdi jedeldetetin arna. Biz tek energııa óndirisine ǵana emes, onyń basqa salasyna ınvestıtsııa salýymyz kerek. Aqtóbe óńiri barlyq talaptarǵa saı keledi», - dedi Italııanyń QR-daǵy elshisi Marko Albertı.
Italıandyq «Arm Wind» kompanııasynyń basshysy Aleks Stıllavato Aqtóbede yntymaqtastyqtyń jańa jolyn qarastyratynyn aıtty.
«Bizde Aqtóbede eki jel elektr stantsııasy jáne Túrkistanda salynyp jatqan zaýyt bar. Qazir biz Qazaqstannyń basqa da salalary men óńirlerinde jańa jobalardy damytqymyz keledi. Qazaqstan - negizgi geografııalyq seriktes. Ótken joly biz ákimmen biraz jaıtty talqyladyq. Biz yntymaqtastyqtyń jańa jolyn tapqymyz keledi», - dedi ol.