Aqtóbede sý jelilerin jóndeý kezinde bıýdjet qarjysy jymqyrylǵan

AQTÓBE. QazAqparat - Aqtóbede memlekettik baǵdarlamany júzege asyrý barysynda bıýdjet qarajatyn jymqyrý faktisi anyqtaldy, dep habarlaıdy QazAqparat tilshisi.

Qarjy monıtorıngi komıtetiniń málimetinshe, Aqtóbe oblysy boıynsha ekonomıkalyq tergeý departamenti «Qazyna» sharasynyń aıasynda bıýdjet qarajatyn jymqyrý faktisin anyqtaǵan.

«Óńirlerdi damytý» memlekettik baǵdarlamasy aıasynda memlekettik mekeme men «KK» JShS arasynda jalpy somasy 163 mln teńgeni quraıtyn kelisimshart jasalǵan.

Sonyń sheńberinde Muǵaljar aýdanynyń aýyldyq okrýginde sýmen jabdyqtaý jelileriniń qurylys-montajdaý jumystary jasalýy tıis bolatyn.

Alaıda jarııalanǵan jumys tolyq kólemde júrgizilmeı, saldarynan aldyn ala esep boıynsha kelgen zalaldyń mólsheri 13 mln teńgeni quraǵan.

Bul fakt negizinde QR QK 189-baby, 4-bólimi 2-tarmaǵy boıynsha sotqa deıingi tergeý amaldary júrgizilip, aqsha jymqyrý faktisine memlekettik organdaǵy laýazymdy tulǵalardyń qatysy tekserilip jatyr.