Aqtóbede sý tasqynynan zardap shekkender partııa baqylaýyna alyndy

AQTÓBE. QazAqparat - Aqtóbede kóptemde 771 úıdi sý basty. Qazirgi derek boıynsha 81 úı qırap, jaramsyz kúıge tústi. Jalǵyz baspanasynan aıyrylyp, dalada qalǵan adamdardy kórgen halyq alǵashqy kúni-aq jumylyp, kómek kórsetýge asyqty. Azyq-túlik, kıim-keshek pen gıgıenalyq zattar jetkizilip, turǵyndar qolda barymen bólisti. Ózge óńirler de esepshot ashyp qarjy jınap, jınalǵan zattardy kólikpen jóneltti. Qıyn kúnderi «Nur Otan» partııasy da halyq janynan tabyldy. Jastar adamdardy evakýatsııalaýǵa atsalysyp, múlikterin tasyp berdi. Jınalǵan zattardy muqtaj azamattarǵa úlestirdi.

Aqtóbedegi ahýal elimizge jaqsy tanys. Іri ózender boıyndaǵy saıajaıdy panalaǵan halyqtyń jalǵyz baspanasy sý ishinde qalyp, bári birer kúnde ýaqytsha mektepterge ornalastyryldy. Keıin qalalyq ákimdik páter jaldap, kóbi týǵan-týystarynyń úıin panalap júrdi. Kún jylyna sýda qalǵan úılerine oralǵan adamdar múlikterin keptirip, úılerindegi zattaryn túgeldep jatyr. Kóbi jaramsyz kúıge túsken. Ony qalalyq ákimdik janynan qurylǵan arnaıy shtab tekserip, baǵalaýshylar shyǵyn kólemin anyqtaıdy.
 

Óńirde atqarylyp jatqan osy jumyspen «Nur Otan» partııasy respýblıkalyq qoǵamdyq qabyldaý bólmesiniń meńgerýshisi Jumajan Júkenov tanysty. Elek ózeni tasyǵan kezde, baspanasyn tastap, bala-shaǵany alyp shyqqan Oryntaı Ábdibákıev Aqtóbe qalasyndaǵy «AZF-6» baý-baqsha ujymyna 2014 jyly Áıteke bı aýdanynan kóship kelgen. Nesıe alyp, úı salǵan zeınetker úı qujattaryn rásimdeýdi qalaıdy.

«Eshkimge ókpeleýge bolmaıdy. Budan da jaman ýaqytty bastan ótkerdik. Bir túıir nan da jeı almaǵan kúnder ótti. Kóktemgi tasqyn kezinde úıge sý kirdi. Qazir ot jaǵyp, keptirip jatyrmyz. Adamdar azyq-túlik, kıim, qajetti zattar ákeldi. Qurylys materıaly qajet dep ótinish te berdik»,- dedi Oryntaı Ábdibákıev. Zeınetkerdiń uly saýda ornynda jumysshy. Tórt nemeresiniń ekeýi mektepke barady, bireýi 2 jastan asty. Ortanshy bala Jaısań mektep-ınternatynda tárbıelenip jatyr. Ár adamǵa kómek degen bastamamen Aqtóbege kelgen «Nur Otan» partııasy respýblıkalyq qoǵamdyq qabyldaý bólmesiniń meńgerýshisi Jumajan Júkenov azyq-túlik pen balalardyń kıimin alyp berdi. Taıaýda bul otbasyǵa qurylys materıaldary da jetkiziletin bolady.

Sý tasqyny kezinde zardap shekkender arnaıy uıymdastyrylǵan qoǵamdyq qabyldaýǵa asyqty. «Geolog» mádenıet úıindegi qabyldaý jumysyna óńirdegi basqarma basshylary men psıhologtar, medıatorlar men qorǵaýshylar da qatysty. Zardap shekkenderge quqyqtyq keńes berildi.
«Óńirler sýǵa ketken kezde «Nur Otan» partııasy Tóraǵasynyń birinshi orynbasary Muhtar Qul-Muhammed jergilikti jerdegi partııa uıymdaryna úndeý jarııalady. Basty mindet - zardap shekkenderiń janynda bolý, kómektesý. Qazir naqty jumys atqarylyp jatyr. Aqtóbe oblysynda jer telimi, páter berildi. Áleýmettik kómek te bar. Komıssııa qurylyp, zardap shekkender túgel tizimge alyndy. Ár adamnyń máselesi tolyq sheshiledi degen úmittemiz. Sonymen qatar, respýblıkalyq qoǵamdyq qabyldaý bólmesi Ádilet, Qarjy, Densaýlyq saqtaý mınıstrlikteriniń ókilderimen turǵandardy qabyldady. Jumys ári qaraı jalǵasady»,- dedi «Nur Otan» partııasy respýblıkalyq qoǵamdyq qabyldaý bólmesiniń meńgerýshisi Jumajan Júkenov.
 

Eki jerde qoǵamdyq qabyldaý ótip, keıin sý tasqyny kezinde zardap shekken Orynbek Pirimjanov pen Kýmıda Halylovaǵa saýyqtyrý, emdeý oryndaryna arnalǵan joldama berildi. Kún saıyn tilegin aıtyp, ótinishin jetkizip jatqan aqtóbelikterdi qabyldaý jumysy óńirde jalǵasa bermek. Sý tasqyny kezinde jetkizilgen azyq-túlik pen kıim de adamdarǵa teń bólinip úlestirilýde.