Aqtóbede sý tasqyny shaıyp ketken jolasty qubyrlary qaıta salynady

AQTÓBE. QazAqparat – Aqtóbe oblysyna qarasty Jarly eldimekeni mańyndaǵy sý shaıyp ketken jolasty qubyrlar qaıta salynǵaly jatyr. Bul týraly «QazAvtoJol» AQ ulttyq kompanııasynyń Aqtóbe oblysy fılıalynyń dırektory Marat Mahambetov málim etti, dep habarlaıdy QazAqparat tilshisi.

«Bıyl kóktemde Jarly aýyly tusyndaǵy 283 shaqyrymynda joldyń astyna tóselgen qubyrdy tasyǵan sý shaıyp ketken edi. Tótenshe jaǵdaı 1 sáýirden 2 sáýirge qaraǵan túni boldy. Biz oqıǵa ornyna dereý jettik. Ol jerde 3 jolasty sý qubyry bolǵan, ol qubyrlar sýdyń qatty tasqynyna tótep bere almady. Endi jolasty sý qubyrynyń ornyna 4 qubyr salynaıyn dep jatyr. Bul jumysty tamyzǵa deıin bitiremiz», - dedi Marat Mahambetov baspasóz týry barysynda.

Óńirlik «QazAvtoJol» AQ basshysynyń aıtýynsha, búginde atalǵan aýmaqta aınalma joldar salynyp bitti.

«Jolǵa jaýapty merdiger kompanııaǵa tıisti tapsyrma berildi. Jalpy sý shaıyp ketken respýblıkalyq joldyń atalǵan bóligi áli paıdalanýǵa berilmegen. ıAǵnı áli salynyp jatqan tasjol», - deıdi ol.

Eske sala ketsek, bıyl kóktemde Aqtóbe oblysynda tasyǵan sý respýblıkalyq mańyzy bar joldy jyryp ketti .

Araǵa az kún salyp «QazAvtoJol» ulttyq kompanııasy sý shaıǵan tasjolǵa qatysty jaǵdaıdy túsindirip ótti.