Aqtóbede sý tasqynynan zardap shekkenderge qandaı kómek beriletini belgili boldy
Aldymen jyljymaıtyn múlik, turmystyq tehnıka men jıhazǵa keltirilgen zalal óteledi, ótemaqy beriledi.
«Ótemaqynyń bul túrin tótenshe jaǵdaı jarııalanǵan aýmaqtardyń (Áıteke bı, Qobda, Muǵaljar, Oıyl, Temir aýdandary men Aqtóbe qalasynyń) turǵyndary ala alady. Ol úshin turǵyndar 30 kúntizbelik kún ishinde materıaldyq shyǵyndy óteý týraly ótinishke jeke kýáliktiń kóshirmesi, joǵalǵan nemese búlingen múliktiń tizbesin qosyp, aýdan ákimdikterine tapsyrady. 15 kúntizbelik kún ishinde komıssııa úı-úıdi aralap, tehnıkalyq akt jasap, keltirilgen zalal shyǵynyn baǵalaıdy. Komıssııa sheshim qabyldap, qarjy bólý máselesin qarastyrady. 30 kúntizbelik kún ishinde ótemaqy tólenedi. Al múlikti baǵalaý kezinde keltirilgen zalal 80% asatyn bolsa, múlik joıyldy dep tanylady, jańa úı salynady», - dep habarlady Aqtóbe oblysy ákiminiń baspasóz qyzmeti.
Ekinshi tólem tótenshe jaǵdaı jarııalanǵan jáne jarııalanbaǵan, sý tasqynynan zardap shekken ár otbasyǵa qarastyrylǵan. Aqtóbe qalasy jáne Áıteke bı aýdanynda 300 myń teńge, qalǵan aýdandarda 100 aılyq eseptik kórsetkish, ıaǵnı, 369 200 teńge. Bul tólemdi alý úshin komıssııa qorytyndysyn men tótenshe jaǵdaılar qyzmetinen anyqtama alady. Keıin jergilikti jumyspen qamtý ortalyǵyna júginýi qajet. Qujattar 8 kún ishinde qaralsa, 3 kún ishinde birjolǵy tólem tólenedi.
Al qujaty rettelmegen, biraq asa muqtaj adamdarǵa «Qamqor-Aqtóbe 2024» qoǵamdyq qory arqyly beriledi. Depýtattar, qoǵamdyq keńes músheleri men zańgerlerdiń basyn biriktirgen qorǵa búginde 400 mln teńgege jýyq aqsha tústi. Munda kásipkerlermen qatar qarapaıym adamdar, eńbek ujymy aqsha aýdaryp jatyr.
Sonymen birge, sý tasqynynan zardap shekken azamattardyń nesıe óteý merzimi úsh aıǵa keıinge shegerildi. Onyń ishinde «Aýyl amanaty» jobasyna qatysýshylar da bar.