Aqtóbede sý tasqynynan zardap shekkenderge bir jolǵy tólem beriledi

<p>AQTÓBE. KAZINFORM - Aqtóbede kóktemgi sý tasqyny kezinde zardap shekken 4 aýdan turǵyndaryna 369200 teńge, al Aqtóbe qalasy men Áıteke bı aýdany turǵyndaryna 300 000 myń teńgeden bir jolǵy tólem beriledi.</p>

Aqtóbe oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnaz Sısenovanyń aıtýynsha, birjolǵy tólemdi alý úshin qalalyq nemese aýdandaǵy jumyspen qamtý bólimderine habarlasý qajet. Aqtóbe qalasy men Áıteke bı aýdanynyń turǵyndary úshin tólem somasy — 300 myń teńge. Tótenshe jaǵdaı jarııalanǵan basqa aýdandardyń turǵyndary úshin – 100 AEK, ıaǵnı, 369 200 teńge beriledi.

- Tótenshe jaǵdaılar departamentinen sý tasqynynan zardap shekkenin rastaıtyn anyqtama, jedel shtab komıssııasynyń qorytyndysyn alyp, jumyspen qamtý bólimine tapsyrady. Bólim qyzmetkerleri barlyq aqparatty 8 jumys kúni ishinde tekseredi. Eger anyqtamadaǵy aqparat rastalsa, 3 jumys kúni ishinde birjolǵy tólem aýdarylady, - dedi Gúlnaz Sısenova.

Aıta keteıik, qazirgi kezde óńirde 700-den astam úıge sý kirgen. Qarjylaı qoldaý kórsetý úshin qor qurylyp, esepshot ta ashyldy. Qazir oblys boıynsha Aqtóbe qalasy men Áıteke bı, Qobda, Oıyl, Muǵaljar, Temir aýdandarynda tótenshe jaǵdaı jarııalanǵan.