Aqtóbede sý tasqyny shyǵynyn esepteý komıssııasy erteń jumysyn bastaıdy
Aqtóbe qalasy Elek ózenin boılaı qonystanǵan baý-baqshy ujymdarynyń turǵyndary kúndiz sýǵa ketken úılerin jaǵalap júr.
Olar rezeńke qaıyq pen kıim alyp, bir-birinen surap, qazirgi ahýalyn qarap ketedi.
— AZF-6 baý-baqsha ujymynda turamyn. 25 naýryz kúni bizge sý kele bastady. 8 balam bar. Olardy tórtke bólip, ulyn bólek, qyzymyzdy bólek aǵaıyn-týysqa jiberdik. Ózim evakýatsııalyq pýnktke bardym. Qazir úıdi qarap júrmin. Zattyń bári júzip ketken. Bul úıdi 2019 jyly satyp alyp, japsarlas bólmeler saldym, gaz kirgizdim. Páter jaldaı da almaımyz. Eshkim bizge páterin bizge jalǵa bermeıdi, — dedi Marat Taılaqbaev.
Biraz turǵyndar keıbir zatyn shatyrǵa shyǵarsa, keıbiri esh áreket etip úlgermegen.
— AZF-9 baý-baqsha ujymynda turamyn. Osynda turyp jatqanyna 5-6 jyl boldy. Bári sýǵa ketti. Tońazytqysh, muzdatqysh, gaz qurylǵysy bári sýda tur. Tek qujatty alyp úlgerdik. Biz úıimizge sý kiredi dep oılamadyq. Bizdiń úıimiz qulamaǵan, al Oıyldyń jaǵdaıy qıyn eken. Halyqqa rahmet aıtamyz. Qazir mektepke ornalastyq. Kıim-keshek, tamaq bar,- dedi turǵyn
Gúlmıra Qoıshybaeva.
Aqtóbe qalasy ákiminiń baspasóz qyzmetiniń habarlaýynsha, sý tasqyny saldarynan zardap shekken turǵyndarǵa kómek beriledi.
Tek aldymen sý kirgen úıdiń sanyn jáne búlingen múlikti túgendeý qajet.
— Komıssııa Aqtóbe qalasyndaǵy eki aýdan ákimdikterimen birge dúısenbide aýmaqtardy aralaý jumystaryn bastaıdy. Ázirge sý basqan saıajaı aýmaqtaryna kirý múmkin bolmaǵandyqtan sýǵa ketken úılerdiń naqty sany shyǵarylǵan joq, — dep habarlady Aqtóbe qalasy ákiminiń baspasóz qyzmeti.
Al tótenshe jaǵdaı jarııalaǵan Áıteke bı aýdanynda esepteý jumysy eki kúnde aıaqtalady dep josparlanǵan.
Qazirgi kezde komıssııa sý kirgen úılerdi aralap júr.
Aqtóbe qalasynyń ákimi Azamat Beket komıssııa úılerge táýelsiz baǵalaýshy kompanııa ókilderimen birge baratynyn málimdedi.