Aqtóbede sý tasqyny shyǵyndaryn esepteý bastaldy

<p>ASTANA. KAZINFORM &ndash; Aqtóbe oblysynda sý tasqyny jaǵdaıy turaqtaldy. Yrǵyz aýdanynan basqa, barlyq evakýatsııalyq pýnktter jabyldy. Bul týraly oblys ákiminiń baspasóz hatshysy Gúlbaǵda Kóbeeva aıtyp berdi.</p>

Onyń aıtýynsha, 6 sáýirde birjolǵy áleýmettik kómek tóleý jumystary bastaldy. Búginge deıin 1 698 ótinim kelip tústi. Jalpy 8-18 sáýir aralyǵynda 1 438 astam ótinim qanaǵattanyp, 466,4 mln teńgeden astam tólem jasaldy.

«Qazirgi ýaqytta óńirdegi jumyspen qamtý bólimderiniń jumysy qaýyrt. Mamandar bir kúnde 140 ótinishke deıin qabyldap, qarjyny ótinish ıeleriniń shottaryna aýdaryp jatyr. Búgingi kúnge deıin sý tasqynynan zardap shekkenderdiń materıaldyq shyǵynyn óteý boıynsha qurylǵan arnaıy komıssııa 2953 ótinish qabyldady. Onyń basym bóligi qaralyp boldy. 11 sáýirden bastap komıssııa sheshimimen 69 otbasyna 143,3 mln teńge somasynda materıaldyq shyǵyn óteldi», - dedi spıker Ortalyq kommýnıkatsııalar qyzmetinde.

Sý tasqyny saldarynan shamamen 2 451 úı zardap shekti. Josparda 595 úı salý qarastyrylǵan.

«Úılerdi qalpyna keltirý jumystary bastaldy. Jańadan salynatyn qurylystyń jer ýchaskeleri men merdigerlik uıymdar anyqtaldy. Máselen, Qobda aýylynda 57 úıdiń qazyǵy qaǵyldy. Qajetti qurylys materıaldary men tehnıkalary tasymaldandy, endi qurylysshylar jumystaryna kirisedi», - dedi G. Kóbeeva.

Jalpy oblys boıynsha 3 232 maldyń qyrylǵany rastaldy, onyń 3 120-sy arnaıy oryndarda órteldi. Komıssııa qorytyndysyna sáıkes, mal ıelerine keltirilgen zalalǵa ótemaqy tóleý erteń bastalady. Bul maqsattarǵa 2,2 mlrd teńge qarastyrylǵan.