Aqtóbede sý tarıfin esepteý tártibi ózgeredi

<p>AQTÓBE. KAZINFORM - Aqtóbede 1 tamyzdan bastap sý tarıfin esepteý tártibi ózgeredi. Tarıf úıde nemese páterde tirkeýde turǵan adam sanyna qaraı ózgeredi.</p>

QR Energetıka mınıstrligi «Neǵurlym az tutynsańyz, soǵurlym kóp únemdeısiz» qaǵıdatyn bekitip, saralanǵan tarıfti belgileýdi tapsyrdy. Qazirgi kezde Aqtóbe qalasy boıynsha bir adamǵa tutyný lımıti bekitildi. Ol 4 deńgeıden turady. QR Ulttyq ekonomıka mınıstrliginiń Tabıǵı monopolııalardy retteý komıtetiniń Aqtóbe oblysy boıynsha departamenti basshysy Erlan Dúısenniń aıtýynsha, bul sýdy únemdeýge múmkindik beredi.

«Birinshi deńgeı boıynsha ár adam aıyna 3 tekshe metr sý tutyna alady. Bul topta qazirgi qoldanystaǵy tarıf saqtalady. Ekinshisi tutyný kólemi — 3-ten 5 tekshe metrge deıin. Tarıf 20%-ǵa joǵary bolady. Úshinshisinde 5-ten 10 tekshe metrge deıin. Tutyný tarıfi 50%-ǵa joǵarylaıdy. Al tórtinshi topta, ıaǵnı, 10 tekshe metrden asatyn bolsa eki eselengen tarıf qoldanylady», — dedi QR Ulttyq ekonomıka mınıstrliginiń Tabıǵı monopolııalardy retteý komıtetiniń Aqtóbe oblysy boıynsha departamenti basshysy Erlan Dúısen. 

Talap boıynsha qala turǵyndaryn salqyn sýmen qamtamasyz etip otyrǵan kommýnaldyq mekeme jelilerdi jańǵyrtý, tozý kórsetkishin azaıtýǵa kóp kóńil bólýi tıis.

1 tamyzdan bastap engiziletin tarıfter mynadaı bolady: 
— ІІ-top (3 tekshe metrge deıin): 129,89 teńge/m³ QQS-men.
— ІІ — top (3-ten 5 tekshe metrge deıin): 155,86 teńge/m³ QQS-men.
— ІІІ — top (5-ten 10 tekshe metrge deıin): 194,83 teńge/m³ QQS-men.
— ІV — top (10 tekshe metrden asatyn kólem): 259,77 teńge/m³ QQS-men.