Aqtóbede sý ortasynda qalyp, kómek suraǵan adamdarǵa birden úsh tikushaq jiberildi

<p>AQTÓBE. KAZINFORM &ndash; Aqtóbe oblysynyń Oıyl aýdany Qaratal (Bersıev) aýylyna birden 3 tikushaq jiberildi. Jaryǵy, jylýy, sýy joq mektepte 350-den astam adam bar.</p>

Aýylǵa azyq-túlik, gıgıenalyq zattar, kıim-keshek pen kórpe-tósek sııaqty gýmanıtarlyq kómek tıelgen tikushaqtar shyqty.

- Shuǵyl kómek kórsetý jáne evakýatsııalaý úshin mamandar bara jatyr. Atap aıtqanda, Mı-8 tikushaqtarynyń bortynda T.Bıgeldınov atyndaǵy áýe qorǵanys kúshteri áskerı ınstıtýtynyń ushqyshtary, medıtsına qyzmetkerleri, psıhologtardan quralǵan qutqarýshylar toby bar,- dep habarlady Aqtóbe oblysy ákiminiń baspasóz qyzmeti.

Mundaǵy mektepti 356 adam panalaǵan. Onyń 94-i balalar.

Eske salsaq, aýyl turǵyndary búgin ózderiniń as-sýsyz salqyn ári qarańǵy mektep ishinde qalǵanyn aıtyp, kómek surady.

Jergilikti ákimdik ókili eki ret tikushaqpen baryp, qona almaı ketkenin habarlady. Bul aýyl túgel sý ortasynda tur.