Aqtóbede stýdentterge arnalǵan jataqhanalardy salý jobasy áli daıyn emes
Aqtóbe oblysynyń ákimdiginde óńir basshysy Berdibek Saparbaevtyń tóraǵalyǵymen keńes ótti. Keńeste Prezıdenttiń bes áleýmettik bastamasy, onyń ishinde stýdentterge arnap jataqhana salý tapsyrmasy qaraldy. «Oblystyq basqarmalar men bilim berý mekemeleriniń basshylaryna qaıda jáne qandaı jataqhana salý kerektigin anyqtaý úshin tapsyrma berilgenine bir aı ótti. Ókinishke qaraı, naqty nátıje joq. Barlyǵy óte baıaý. Mundaı qarqynymyzben biz jobalardy mınıstrlikterge ýaqytynda bermeımiz, qurylys úshin aqsha ala almaımyz. Aýdandarǵa barǵan kezimde, turǵyndar jataqhana jetkiliksiz bolǵan soń balasy úshin jalǵa alynǵan páterge aqsha tóleýge týra keletinin aıtady. Prezıdenttiń bastamalarynyń biri osy máseleni sheshýge múmkindik beredi, biz bul múmkindikti paıdalanýymyz kerek», - dedi oblys ákimi Berdibek Saparbaev.
Aqtóbe oblystyq bilim basqarmasynyń basshysy Lázzat Orazbaevanyń aıtýynsha, oblysta 44 kolledj bar. Onyń 13-inde jataqhana joq. Al ózge kolledjderdegi jataqhanalar stýdentterdi baspanamen tolyq qamtýǵa múmkindik bermeı otyr. Qazirgi kezde kolledjerde bilim alyp júrgen 9 myńǵa jýyq stýdenttiń tek 2 myńǵa jýyǵy jataqhanamen qamtylǵan. Ózgesi týma-týystyń úıinde, jalǵa alǵan páterde turady. Aqtóbe oblystyq ishki saıasat basqarmasynyń málimetterine súıensek, M.Ospanov atyndaǵy Batys Qazaqstan memlekettik medıtsınalyq ýnıversıtettiń 436 stýdentine oryn jetpeıdi. Qalǵan joǵary oqý oryndary ózderiniń stýdentterin jataqhanalarmen tolyq qamtamasyz etti.
Aqtóbe oblysy ákiminiń baspasóz qyzmetiniń habarlaýynsha, keńes kezinde óńir basshysy Berdibek Saparbaev «Barlyǵyna arnalǵan tegin kásiptik jáne tehnıkalyq bilim» jobasynyń sapaly oryndalýyn, eńbek naryǵynyń naqty qajettilikterin eskere otyryp kadr daıarlaý qajettiligin talap etti.