Aqtóbede sport mektebi tárbıelenýshisiniń óliminen soń kimder jazaǵa tartyldy
Qaıǵyly oqıǵadan soń Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjindegi jumysqa saraptama jasaldy. Sonymen birge prokýror uıǵarymymen zańsyzdyqtardy joıý jumystary júgizildi.
«Ábýbákir Beksultannyń óliminen soń qyzmettik tekserý júrgizildi. Internat dırektoryna qatań sógis berildi. Tárbıeshiniń kómekshisi Eset Dúısenov qatań sógis alyp, jumystan shyǵaryldy. Tárbıeshiniń kómekshisi Asylbek Tapesov, vahter S.Qosmaǵambetovaǵa qatań sógis berildi. Al dırektordyń tárbıe isi jónindegi orynbasary Sandýǵash Nurmaǵambetova qatań sógis alyp, jumystan shyǵaryldy. Sonymen birge erkin kúres bóliminiń jattyqtyrýshy-pedagog quramy tolyq ózgertildi. Atap aıtqanda, T.Seıtov jumystan shyǵaryldy. K.Savanaev kelisimshart merzimi aıaqtalǵan soń ıaǵnı, qazan aıynda jumystan shyǵarylady. A.Bekjanov eńbek demalysynan soń jumystan shyǵarylady. Oǵan qatań sógis jarııalandy. Jattyqtyrýshy A.Jarylqasynov jumystan shyǵaryldy. Pedagog-psıholog T.Sovetova qatań sógis aldy», - dep habarlady Aqtóbe oblysy ákiminiń baspasóz qyzmeti.
Al qazirgi dırektor Qaırat Ájbaǵambetov 2024 jyldyń 8 aqpany kúni ǵana, ıaǵnı qaıǵyly oqıǵa bolardan birer kún buryn rotatsııa arqyly taǵaıyndalǵan.
«Qaırat Ájbaǵambetov – bilikti basshy, jaýapkershiligi mol maman. Taǵaıyndalǵan kúnnen bastap ınternat jumysyn qolǵa aldy. Oǵan prokýratýra, QR adam quqyqtary jónindegi ókilderinen quralǵan oblys ákimdigi komıssııasy anyqtaǵan buzýshylyqtardy joıý tapsyrmasy berildi», - dep habarlady Aqtóbe oblysy ákiminiń baspasóz qyzmeti.
Eske salsaq, búgin Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjinde bolǵan qylmystyq oqıǵa sotta qarala bastady. Bıyl 11 sáýir kúni Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledjinde 8 synyp oqýshysy kóz jumdy.