Aqtóbede soǵys ardagerlerine 2 mln teńgeden beriledi
Aqtóbe oblysynda 1 mamyr Qazaqstan halqynyń birligi kúni, 7 mamyr Otan qorǵaýshylar kúni jáne 9 mamyr Jeńis kúni merekelik-tanymdyq sharalar ótedi.
Qala men aýdandardaǵy ortalyq saıabaqtarda, mádenıet úılerinde jergilikti ónerpazdar óz baǵdarlamalaryn usynady.
Al 9 mamyr kúni ardagerlerge qurmet kórsetiledi.
«Soǵys ardagerleri úshin materıaldyq kótermeleý retinde 2 mıllıon teńge mólsherinde birjolǵy tólem uıymdastyrylady. Qazirgi tańda oblysta 8 soǵys ardageri bar. Olardyń altaýy Aqtóbe qalasynda, ekeýi Muǵaljar jáne Hromtaý aýdandarynda. Al Ekinshi dúnıejúzilik soǵys qatysýshylaryna teńestirilgender sany – 1933. Olarǵa tólenetin birjolǵy kómek ár qaısysyna 50 000-100 000 teńgeni quraıdy. Sonymen qatar, tyl ardagerlerine, ıaǵnı, 1941 jylǵy 22 maýsym – 1945 jylǵy 9 mamyr aralyǵynda keminde alty aı jumys istegen adamdarǵa 50 000 teńge beriledi. Nátıjesinde oblys boıynsha 5415 adam 378,7 mln teńge birrettik tólemmen qamtylady», - dedi Aqtóbe oblystyq ishki saıasat basqarmasynyń basshysy Lázzat Orazbaeva.
Aıta keteıik, ardagerler turatyn úıdiń aýlalarynda kontserttik sharalar uıymdastyrylady.
Soǵys ardagerleri men qan maıdanda qaza tapqan jaýyngerlerdiń ata-analary men jesirlerine, tyl eńbekkerlerine qurmet kórsetilip, eriktiler járdem kórsetedi.
«Beıbit kún jasasyn álemde!» atty merekelik shara barlyq saıabaqta ótedi.
«Jeńis kúni «Jaýjúrek polk» sherýi ótpeıdi. Shara formaty ózgerip, Aqparat jáne qoǵamdyq damý mınıstrliginiń bastamasymen «Jaýjúrek polk» platformasynda jáne áleýmettik jelilerdegi akkaýnttarda onlaın túrinde uıymdastyrylady. Munda aktsııaǵa qatysýshylardyń biryńǵaı deregi jınalyp, qazaqstandyq soǵys ardagerleriniń tarıhı anyqtamalyqtary jasalady. Kez kelgen adam qolda bar aqparatty qaldyryp, keıin sol málimetti qoldanýǵa múmkindik alady», - dedi Lázzat Orazbaeva.