Aqtóbede syrǵanaqtardyń qaýipsizdigi tekserilip jatyr

<p>AQTÓBE. KAZINFORM &mdash; Aqtóbe qalalyq kásipkerlik bólimi syrǵanaqtar men attraktsıondardy tekserip jatyr. Bárinde qaýipsizdik talaptary saqtalýy tıis.</p>

Aqtóbe qalasynda áli de qar joq. Degenmen demalys oryndary qazirgi kezde syrǵanaqtardyń qańqasyn ázirler qoıyp jatyr. Al qalalyq kásipkerlik bólimi olardyń talapqa saı bolýyn qadaǵalaıdy.

Foto: Aqtóbe qalalyq kásipkerlik bólimi

— Talapqa sáıkes mehanıkalandyrylmaǵan attraktsıondar (batýt, syrǵanaq, tarzankalar jáne t. b.) jergilikti atqarýshy organǵa tirkeýge jatady. Osyǵan oraı Aqtóbe qalasynyń kásipkerlik bóliminiń mamandary qala aýmaǵynda ornalasqan attraktsıondardy tekserý jumystaryn júrgizip jatyr. Tekserýdiń negizgi maqsaty — attraktsıondardyń qaýipsizdik talaptaryna sáıkestigin qamtamasyz etý, olardyń ýaqtyly kásipkerlik bólimine tirkelýin qadaǵalaý, sondaı-aq adamdardyń qaýipsizdigin saqtaý. Tekseris barysynda attraktsıondardy qaýipsiz paıdalaný jáne de paıdalanýshylardyń qaýipsizdigin basty nazarda ustaý boıynsha tıisti usynystar men eskertpeler berildi, — dep habarlady Aqtóbe qalalyq kásipkerlik bólimi.

Buǵan deıin habarlaǵanymyzdaı, Soltústik Qazaqstan oblysynda Petropavlda ǵana emes, ár aýdanda hokkeı korttary, shańǵyny jalǵa berý pýnktteri jumys isteıdi.