Aqtóbede shekteý sharasy jeńildedi
Aqtóbe oblysynda áli de túrli konferentsııa, kórme, forým, oıyn- saýyq, sporttyq jarystar ótkizýge, sondaı-aq adamdar kóp jınalatyn otbasylyq, saltanatty, estelik jáne basqa da is-sharalardy uıymdastyrýǵa tyıym salynǵan. Jabyq alańdaǵy balalar oıyn alańdary, karaoke, bılıard, kompıýterlik klýbtar jumys istemeıdi. Mektepterdegi ashana da qyzmet kórsetpeıdi. Degenmen keıbir shekteý sharasy jeńildedi. Saýda oryndary, bazarlar jumys jáne demalys kúnderi ishki tártipke sáıkes qyzmet kórsetedi. Buǵan deıin jeksenbi jáne mereke kúnderi saǵat 17:00-ge deıin qyzmet kórsetken bolatyn.
«Sulýlyq salondary, shashtaraz, SPA ortalyqtary jáne kosmetologııalyq qyzmet kórsetetin obektiler dál osyndaı tártip boıynsha jumys isteıdi. Jabyq sport nysandarynda 5 adamnan aspaıtyn jeke jáne toptyq jattyǵý júrgizýge ruqsat. Monsha, saýna, basseınge de jazylyp, araqashyqtyqty saqtap, jumys jáne demalys kúnderi barýǵa bolady. Mektepke deıingi mekemelerdegi kezekshi top balalarynyń sany 20-dan aspaýy tıis», - dep habarlady oblystyq sanıtarlyq-epıdemıologııalyq baqylaý departamentiniń baspasóz qyzmeti.
Sonymen birge ashyq alańdaǵy attraktsıondar jumys isteıdi. Ári Qazaqstan Respýblıkasynyń chempıonattaryn jáne respýblıkalyq jarystardy kórermenderdiń qatysýynsyz ótkizýge bolady. Tek bir mezgilde qatysýshylar sany 100 adamnan aspaýy tıis. Oqý-jattyǵý jıyndarynda adam sany 30-dan aspaýy kerek.