Aqtóbede shegirtkeniń jappaı kóbeıýi tirkeldi
Aqtóbe oblysy boıynsha bıyl 784 myń gektardan astam jer shegirtkege qarsy óńdelýi kerek. Onyń basym bóliginde ıtalııalyq shegirtkege qarsy ý sebiledi.
– Bıyl 3-10 mamyr kúnderi aralyǵynda Yrǵyz, Muǵaljar, Oıyl, Baıǵanın, Shalqar, Temir, Baıǵanın, Qobda aýdandarynda ıtalııalyq shegirtke dernásilderiniń alǵashqy ushýy tirkeldi. Al, 11-12 mamyr kúnderi Oıyl aýdany Kóptoǵaı, Sh.Bersıev, Oıyl aýyldyq okrýgterinde ıtalııalyq shegirtkeniń jappaı shyǵýy tirkeldi, - dedi Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń Aqtóbe oblysy boıynsha aýmaqtyq ınspektsııasy bóliminiń bas mamany Arystanbek Jakıbaev.
Shegirtkege qarsy jerdi óńdeý jumystaryna 105 tehnıka jumyldyrylady. Onyń ishinde aerozoldyq generator, jeńil avıatsııa da bar.
– Óńdeý jumysy 15-19 mamyr kúnderi aralyǵynda Oıyl, Shalqar, Yrǵyz, Temir, Alǵa, Muǵaljar aýdandarynda bastaldy. Barlyǵy 10 790 gektar jer óńdeldi. Úıirli shegirtkege qarsy hımııalyq óńdeý jumystaryna respýblıka bıýdjet esebinen qarjy bólinip, qajetti zattar aýdandarǵa jiberildi, - dedi Arystanbek Jakıbaev.
Aıta keteıik, shegirtkege qarsy ýlaı jumysy Aqtóbeniń barlyq aýdanynda júrgiziledi.