Aqtóbede sharýashylyqtaǵy sıyrlardyń qarasan aýrýynan ólgeni belgili boldy
Aqtóbe oblystyq veterınarııa basqarmasynyń habarlaýynsha, ólgen maldan alynǵan synama qorytyndysy búgin shyqty. Onda sıyrlardyń qarasan aýrýyna shaldyqqany belgili boldy.
- Aqtóbe oblystyq veterınarııalyq zerthanasynyń saraptaý aktisiniń nátıjesine sáıkes qarasan aýrýyna oń nátıje kórsetti. Búgingi tańda anyqtalǵan epızootııalyq oshaqqa Toqmansaı aýyldyq okrýgi ákiminiń shekteý qoıý týraly sheshimi kútilip otyr. Saýyqtyrý is-sharalaryn «Epızootııaǵa qarsy jasaq» RMK mamandary júrgizedi. QR Zańnamasyna sáıkes mal ıesine keltirilgen shyǵyn respýblıkalyq bıýdjetten tólenedi,- dep habarlady oblystyq veterınarııa basqarmasy.
Eske salsaq, 22-27 kúnderi aralyǵynda Alǵa aýdany Toqmansaı aýyldyq okrýginde «Óletti» sharýa qojalyǵynda 9 bas iri qara óldi. Veterınar mamandar aldymen ýlanǵan dep boljam jasady. Biraq boljam rastalmaı, qarasan aýrýy anyqtaldy. Veterınar mamandar janýarlardyń barlyq óleksesin Toqmansaı eldi mekenindegi mal qorymyna aparyp, zalalsyzdandyrdy.
Osyǵan deıin Aqtóbe oblysy Alǵa aýdanyndaǵy sharýashylyqtardyń birinde 9 múıizdi iri qaranyń óleksesi anyqtalǵanyn jazdyq.