Aqtóbede shaǵyn jáne orta bızneske 9 mlrd teńgege jýyq qarjy bólindi
Ulttyq ekonomıka mınıstri Álibek Qýantyrov Aqtóbede jergilikti kásipkerlermen kezdesti. Kezdesýge qatysýshylar shaǵyn jáne orta bıznesti damytý, onyń ishinde mono jáne shaǵyn qalalar men aýyldaǵy kásipkerlikti damytýdyń 2021-2025 jyldarǵa arnalǵan Ulttyq jobasynyń negizgi baǵyttaryn talqylady. Atap aıtqanda, zamanaýı formattaǵy saýda obektileriniń qurylysyn sýbsıdııalaý, tarıftik júktemeni azaıtý, ShOB sýbektileriniń salyq mindettemeleri jáne memlekettik baǵdarlamalarǵa qatysý sharttary týraly sóz qozǵaldy. Óz kezeginde mınıstr barlyq suraq pen usynys boıynsha mınıstrliktiń ustanymyn aıtyp, árbir máseleni jeke sheshý keregin aıtty.
Sondaı-aq ol Úkimettiń shaǵyn jáne orta bıznesti, onyń ishinde kásipkerlikti damytý jónindegi Ulttyq joba aıasynda qoldaý boıynsha belsendi jumys júrgizip jatqanyn eske saldy. Máselen bıyl Aqtóbede shaǵyn jáne orta bıznes sýbektilerine memlekettik qoldaý kórsetý úshin 8,6 mlrd teńge bólindi. Qazirgi kezde 3 mlrd teńge somasyna 306 joba sýbsıdııalandy, al kepildendirý kólemi 4 mlrd teńgeden asty.
Sondaı-aq mınıstr azamattardy jeke qabyldady. Kezdesýge kelgen aqtóbelikterdiń kóbisi bıznesmender boldy. Olar ózderin tolǵandyrǵan máselelerin kóterdi. Sonyń ishinde memlekettik-jekemenshik áriptestik salasyndaǵy eńbekaqy tóleý qory bóliginde memlekettik mindettilikti ulǵaıtý, argoónerkesip kesheni salasynda kredıtterdi óteý boıynsha qosymsha shyǵystardy jabý, jabdyqtardy ákelýge ımporttyq bajdardy azaıtý jáne «Qarapaıym zattar ekonomıkasy» aıasynda nesıe berý máselelerin qarastyrýdy surady.
Ulttyq ekonomıka mınıstri azamattardyń barlyq ótinishin baqylaýǵa aldy.
Jumys sapary barysynda Á.Qýantyrov «Damý» Qorynyń óńirlik fılıalynyń jumys barysymen tanysty. Mınıstrge Aqtóbe oblysyndaǵy memlekettik baǵdarlamalardyń iske asyrylý qorytyndylary týraly baıandaldy. Bıyl óńirde 443 mlrd teńge somasyna 8 myńnan astam jobaǵa qoldaý kórsetildi. Aımaqtyq qarjylandyrý baǵdarlamasy aıasynda 121 qaryz alýshy kómek aldy. Sonymen qatar Ulttyq ekonomıka mınıstri Aqtóbe oblysy boıynsha Tabıǵı monopolııalardy retteý komıtetiniń departamenti jumysymen tanysty. Jıynda departament qyzmetiniń negizgi baǵyttary talqylandy. Á.Qýantyrov tarıf qalyptastyrý máselelerin turaqty baqylaýda ustaýdy jáne halyqpen keri baılanysty kúsheıtýdi tapsyrdy.