Aqtóbede Senat depýtaty saılaýyna qatysýǵa 5 adamnan ótinish tústi

AQTÓBE. QazAqparat - Aqtóbede bes úmitkerden ótinish tústi. Senat depýtaty saılaýyna qatysýǵa nıet bildirgenderdiń tórteýi ózin-ózi usynǵan, dep habarlaıdy QazAqparat tilshisi.

Aqtóbe oblystyq aýmaqtyq saılaý komıssııasynyń tóraǵasy Nurlybek Júsipov óńirlik kommýnıkatsııalar qyzmetinde baspasóz konferentsııasyn ótkizdi.

Onyń aıtýynsha, oblystyq saılaý komıssııasy saıası partııalar men qoǵamdyq birlestikterdiń usynysy negizinde 7 músheden turady. Báriniń tájirıbesi bar.

Oblystyq saılaý komıssııasyna Parlament Senatynyń depýtattyǵyna kandıdat retinde saılaýǵa túsý úshin 5 adamnan ótinish tústi.

«Shyma Erbol Maraluly 1992 jyly dúnıege kelgen. «AMANAT» partııasy Qobda aýdandyq fılıalynyń atqarýshy hatshysy Qobda aýylynda turady. Ol ózin-ózi usyndy. Bekbaýova Dana Bahytqyzy 1977 jyly dúnıege kelgen. Aqtóbe oblysy boıynsha «Atameken» óńirlik kásipkerler palatasynyń dırektory. Ol da ózin-ózi usyndy. Kozmov Iraklıı ıÝrevıch 1980 jyly dúnıege kelgen. «InvestStroıGrad» JShS dırektory ózin-ózi usyndy. Beknazarov Rahym Aǵybaıuly 1967 jyly dúnıege kelgen. Q.Jubanova atyndaǵy Aqtóbe óńirlik ýnıversıtetiniń ǵylym jáne ınnovatsııa jónindegi prorektory ózin-ózi usyndy. Nuǵmanov Amangeldi Shaıhollauly 1967 jyly dúnıege kelgen. Aqtóbe oblystyq máslıhatynyń hatshysyn Hromtaý, Mártók aýdandyq máslıhattarynyń sessııalarymen usynyldy»,- dedi Aqtóbe oblystyq aýmaqtyq saılaý komıssııasynyń tóraǵasy Nurlybek Júsipov.

Kandıdattardyń QR Konstıtýtsııasy men «Qazaqstan Respýblıkasyndaǵy saılaý týraly» Zańynda qoıylatyn talaptarǵa sáıkestigi anyqtaldy.

Olarǵa oblystyq, qalalyq jáne aýdandyq máslıhattar depýtattarynyń kelisimin alý úshin qol qoıý paraqtary berildi.

Búgingi kúni barlyq qajetti qujattaryn tapsyrǵan Nuǵmanov Amangeldi Shaıhollauly Senat depýtattyǵyna kandıdat retinde tirkeýden ótip, tıisti kýálik tapsyryldy.

Aıta keteıik, oblys boıynsha 202 depýtattyq mandat bar. Oblystyq máslıhatta 33, qalalyq máslıhatta 30, aýdandyq máslıhattarda 139 depýtat.