Aqtóbede saraı órtenip, 4 adam jansaqtaý bólimine tústi

AQTÓBE. QazAqparat – Hromtaý qalasynda saraıdan órt shyǵyp, garajǵa ulasty. Ondaǵy kólik janyp ketip, tórt adam aýrýhananyń jansaqtaý bólimine tústi, dep habarlaıdy QazAqparat tilshisi.

Oqıǵa búgin túnde boldy. Oblystyq TJD baspasóz qyzmetiniń habarlaýynsha, Hromtaý qalasynda úı aýlasynda turǵan saraıdan órt shyqqan. Órt keıin garajǵa ulasyp, ondaǵy «Toyota Camry» markaly kóligi janyp ketti.

«Kúıik shalǵan 4 adam qazir Hromtaý aýdandyq aýrýhanasynyń jansaqtaý bóliminde. Báriniń jaǵdaıy aýyr. Órt bir saǵattan keıin sóndirildi. Qazirgi kezde órttiń shyǵý sebebi anyqtalyp jatyr. Qutqarýshylar órtti saraı janynda turǵan úıge jetkizbeı sóndirip úlgerdi. Sonymen birge, bir gaz ballonyn shyǵardy. Úı ıesiniń aıtýynsha, órt shyqqanyn kórgen kezde birden adamdardy qutqarýǵa barǵan. Onda páter jaldaýshylar turǵan. Barlyǵy da órt ishinen shyqqan», - dep habarlady oblystyq TJD departamentiniń baspasóz qyzmeti.

Aıta keteıik, bıyl oblys aýmaǵynda 400-den astam órt tirkeldi. Onyń ishinde Aqtóbe qalasynda 8 aıda 173 órt oqıǵasy bolyp, 2 adam kóz jumdy. Taǵy beseýi túrli dárejede jaraqat aldy.