Aqtóbede salyq qyzmetkerleri jazalandy

<p>AQTÓBE. KAZINFORM &ndash; Aqtóbe oblysynyń prokýratýrasy 200-den astam kásipkerlerdi ákimshilik jaýapkershilikke tartý týraly zańsyz qaýlylardyń kúshin joıdy.&nbsp;</p>

Prokýratýranyń baspasóz qyzmeti málimdegendeı, Hromtaý aýdany boıynsha memlekettik kirister basqarmasy kásipkerlerdiń qatysýynsyz ÁQBtK-niń 272-baby boıynsha («Memlekettik kirister organyna salyq eseptiligin usynbaý») 45 kásipkerdi ákimshilik jaýapkershilikke tartqan. Al ÁQBtK-ge sáıkes, ákimshilik quqyqbuzýshylyq týraly ister ózine qatysty is júrgizilip jatqan adamnyń qatysýymen qaralady.

Taǵy bir mysal, Aqtóbe qalasy jáne Muǵaljar aýdany boıynsha memlekettik kirister basqarmasy 178 kásipkerge ÁQBtK-niń 92-1-baby boıynsha («Qazaqstan Respýblıkasynyń mindetti áleýmettik medıtsınalyq saqtandyrý týraly zańnamasyn buzý») jaýapkershilikke tartý merzimi aıaqtalǵannan keıin zańsyz aıyppul salǵan.

Prokýratýra 223 jeke kásipkerge qatysty ákimshilik quqyqbuzýshylyq týraly qaýlylardyń kúshin joıyp, kásipkerlerdiń quqyǵyn qorǵady.

Aqtóbe qalasy, Hromtaý jáne Muǵaljar aýdandary boıynsha memlekettik kirister basqarmasynyń kináli laýazymdy tulǵalary tártiptik jaýapkershilikke tartyldy.