Aqtóbede Saǵadat Nurmaǵambetovke arnalǵan memorıaldyq taqta ashyldy

AQTÓBE. QazAqparat - Aqtóbede Ábilqaıyr han dańǵyly men Kıselev kóshesiniń qıylysynda memleket qaıratkeri, Sovet odaǵynyń batyry, Qazaqstannyń tuńǵysh qorǵanys mınıstri, Halyq qaharmany, armııa generaly Saǵadat Nurmaǵambetovke arnalǵan memorıaldyq taqta ashyldy, QazAqparat.

S.Nurmaǵambetovke memorıaldyq taqtanyń ashylýy - batyrdyń 95 jyldyq mereıtoıyna oraı uıymdastyrylyp otyr. Saltanatty rásimge qatysqan Aqtóbe qalasynyń ákimi Іlııas Ispanov, áskerıler, qoǵamdyq birlestik ókilderi, belsendi jastar men qala turǵyndary gúl shoqtaryn qoıyp, batyr rýhyna taǵzym etti.

Saǵadat Qojahmetuly 1942 jyly mektepten ásker qataryna shaqyrylyp, Túrikmenstanǵa Kýshka qalasyndaǵy áskerı ýchılışege jiberilgen. 1943 jyldyń sáýir aıynan bastap oqýdy aıaqtaǵannan keıin. 1945 jyldyń mamyryna deıin pýlemet vzvodynyń komandıri, pýlemet rotasynyń komandıri, 5-shi soqqy armııasynyń Berlın atqyshtar dıvızııasynyń ІІ dárejeli Sývorov ordeni 301-shi Donetsk atqyshtar polkiniń 1052-shi atqysh polkiniń quramynda atqyshtar batalonynyń komandıri retinde maıdan dalasynda shaıqasty.

1946 jyldyń maýsymynan 1949 jyldyń qarashasyna deıin M. Frýnze atyndaǵy Áskerı akademııada oqydy. Ony aıaqtaǵannan keıin túrli shtabtyq jáne komandalyq laýazymdarda qyzmet atqardy: Túrkistan áskerı okrýgi shtabynyń jedel basqarmasynyń aǵa ofıtseri, motoatqyshtar polkiniń komandıri, motoatqyshtar dıvızııasy shtabynyń bastyǵy, Qazaq SSR Azamattyq qorǵanys shtabynyń bastyǵy, Orta Azııa áskerı okrýgi áskerleri qolbasshysynyń jańadan orynbasary, Ońtústik áskerler toby (Majarstan) qolbasshysynyń birinshi orynbasary. Osy ýaqyt ishinde eki ret SSSR Qarýly kúshteri Bas shtaby akademııasynyń kýrstarynda oqydy. Sovet armııasynda oǵan «general-maıor» (1964) jáne «general-leıtenant» (1972) áskerı ataǵy berildi.

1989 jyly okrýg taratylǵannan keıin soǵys, eńbek jáne Qarýly kúshter ardagerleriniń Qazaq respýblıkalyq keńesiniń tóraǵasy boldy.

1991 jylǵy qazanda QR Prezıdentiniń Jarlyǵymen Memlekettik qorǵanys komıtetiniń tóraǵasy, al 1992 jylǵy mamyrda QR Qorǵanys mınıstri bolyp taǵaıyndaldy. Qazaqstan Respýblıkasynyń Qarýly kúshterinde oǵan general-polkovnık (1992) jáne armııa generaly (5 mamyr 1993 j.) áskerı sheni berildi.

1994 jylǵy 23 mamyrda Qazaqstan Respýblıkasy Prezıdentiniń Jarlyǵymen oǵan № 1 «Altyn Juldyz» tapsyrýymen Halyq Qaharmany ataǵy berildi.

1995 jyldyń qarashasynda armııa generaly ataǵynda otstavkaǵa shyqty, odan keıin Respýblıka Prezıdentiniń keńesshisi boldy.

1971-1994 jyldary Qazaqstan Joǵarǵy keńesiniń depýtaty bolyp birneshe ret saılandy.