Aqtóbede rezervýarǵa qulaǵan oqýshy esin jınamastan kóz jumdy
Aqtóbe qalasyndaǵy Janqoja batyr kóshesinde turatyn 9 jastaǵy bala aýladan shyǵyp, oınap ketken. Keıin ata-anasy polıtsııaǵa qońyraý shalǵan. 102 nómirine habarlama 31 mamyr kúni saǵat 23:31-de túsken. Birden izdestirý jumysy júrip, bala tereńdigi 10 metr bolatyn rezervýardan tabyldy. Biraq, jaǵdaıy óte nashar boldy. Polıtsııa qyzmetkerleri men qutqarýshylar ony rezervýardan kóterip shyǵaryp, balalar aýrýhanasynyń jansaqtaý bólimine jetkizildi.
«Polıtsııa qyzmetkerleri keshendi izdestirý sharalaryn júrgizip, balanyń bolýy múmkin jerlerdi qarap shyqty. Kámeletke tolmaǵandar isi jónindegi polıtsııa ınspektorlary elevator ǵımaratyn tekserip, tereńdigi 10 metr bolatyn rezervýardan tapty. Jaǵdaıy óte nashar boldy. Polıtsııa qyzmetkerleri men qutqarýshylar balany rezervýardan kóterip shyǵardy. Kámeletke tolmaǵan bala balalar aýrýhanasynyń jansaqtaý bólimine jatqyzyldy. Aqtóbe oblysy PD ata-analardan balalardy qaraýsyz qaldyrmaýdy suraıdy. Balalarǵa qurylys alańdary men qaraýsyz qalǵan ǵımarattar aýmaǵynda júrýdiń erejesin úıretý kerek. Ata-analar balalarynyń qaı ýaqytta, qaı jerde júrgenin baqylaýy qajet», - degen edi oblystyq PD baspasóz qyzmetiniń jetekshisi Erbolat Sarqulov.
Oblystyq balalar aýrýhanasyna túsken oqýshynyń jaǵdaıy óte aýyr boldy. Ol sol kúıi esin jııa almady. Oblystyq densaýlyq saqtaý basqarmasy baspasóz qyzmetiniń habarlaýynsha, em-sharaǵa qaramastan, bala keshe saǵat 22:00-de kóz jumdy.