Aqtóbede repressııa qurbany kúıshi Qambar Medetovke arnalǵan kesh ótti
31 mamyr - Saıası qýǵyn-súrgin jáne asharshylyq qurbandaryn eske alý kúni. Búgin oblystyq halyq shyǵarmashylyǵy ortalyǵy jáne Kúıshiler odaǵy kórnekti kúıshi, Qurmanǵazy atyndaǵy halyq aspaptar orkestrin qurýshylardyń biri Qambar Medetovtyń 120 jyldyǵyna arnalǵan «Kúıshi Qambar» atty eske alý keshin ótkizdi. Eske alý keshine belgili kúıshiler, Q.Medetov atyndaǵy Mártók aýdandyq óner mektebiniń ókilderi, jastar qatysty.
«Kezinde repressııaǵa ushyrap, esimderi men eńbekteri uzaq jyldar boıy atalmaı kelgen óner qaıratkerleri az emes. Solardyń biri — belgili kúıshi, Ábilqaıyr hannyń jetinshi urpaǵy, uly kompozıtor Dáýletkereı, ǵajaıyp ánshi Muhıt sekildi mýzyka tarıhynda aty altyn árippen jazylǵan ónerli áýletten shyqqan Qambar Medetov. Ol XX ǵasyrdyń 30-jyldaryndaǵy saıası repressııanyń qurbany bolyp, Qıyr Shyǵysqa aıdalǵannan, qaıtyp oralmaǵan. Kúıshi Qambar Medetov «Aqsaq qulan», «Boǵda», «Joshyhan», «Shalqyma», «Qarasaı», «Qostaıbek», «El aırylǵan», «Qara jorǵa», «Altynaı» taǵy da basqa kóptegen kúıdi erekshe tartqan. Solardyń ishinde erekshe kóńilinen shyǵyp, jadynda saqtalǵany – ataqty «Aqsaq qulan» kúıi. Ataqty A.Zataevıchke halqymyzdyń baı án-kúı muralarynyń birqatar nusqasyn jazdyryp, qaldyrǵan óner ıesiniń eske alý keshinde Qazaqstannyń eńbek sińirgen qaıratkeri, qazanǵaptanýshy Jaılaý Asylhanov, «Kúıshiler odaǵy» oblystyq fılıalynyń tóraǵasy, kúıshi, Ǵ.Jubanova atyndaǵy oblystyq fılarmonııasynyń A.Jubanov atyndaǵy qazaq ult aspaptar orkestriniń bas kontsertmeısteri ári ustaz Talap Hamzın qatysty», - dedi oblystyq halyq shyǵarmashylyǵy ortalyǵy dırektorynyń orynbasary Gúlnar Seıtalına.
Aıta keteıik, shara aıasynda 9 kúıshi Kúıshiler odaǵyna múshe boldy. Olarǵa Odaqtyń kýáligi tabystaldy.