Aqtóbede relsten shyqqan poıyz jolaýshylaryna kómek kórsetildi
Aqtóbe oblysy ákimi baspasóz qyzmetiniń habarlaýynsha, aımaq basshysy Eraly Toǵjanov temirjoldaǵy apattan keıingi jaǵdaıdy baqylaýyna alyp, jolaýshylarǵa kómek kórsetýdi tapsyrdy.
«Olarǵa ystyq tamaq jetkizildi. Dárigerler de jolaýshylardy qarap shyqty. Eshkim zardap shekken joq. Oqıǵa ornyna jóndeý, qalpyna keltirý jumystaryn atqaratyn poıyz jetti. TJD men «Qazaqstan temir joly» UQ» AQ qyzmetkerleri birlesip jumys istep jatyr. Apattyń sebebin arnaıy komıssııa anyqtaıdy», - dep habarlady oblys ákiminiń baspasóz qyzmeti.
Eske salsaq, búgin saǵat 10:15-te «Bishkek-Samara» poıyzy manevr jasaıtyn teplovozben soqtyǵysyp, eki vagon relsten shyǵyp ketken bolatyn. Apat kezinde №317 jolaýshylar poıyzynyń teplovozy, №1 vagony jáne №2 jolaýshylar poıyzynyń úsh dońǵalaqty juby relsten shyǵyp ketti. Oqıǵa ornyna «Qazavıaqutqarý» tikushaǵy ushyp shyǵyp, qutqarý bólimsheleri jiberildi jáne QTJ qalpyna keltirý poıyzy jóneltildi.
«Oblystyq TJD 6 adam men bir tehnıka jiberildi. Jergilikti atqarýshy organnan 5, temirjol polıtsııasynan 3 qyzmetker keldi. Oqıǵa ornyna jetken kezde eki vagon men teplovozdyń joldan shyqqanyn kórdik. «Qazaqstan temir joly» qyzmeti 100 jumysshy jiberip, qalpyna keltirý jumystaryn júrgizip jatyr», - dedi oblystyq TJD bastyǵy Marǵulan Amanbaev.