Aqtóbede iri munaı kompanııasy suıytylǵan gaz tasymaldaýshylardan aldyn ala tólem talap etken

<p>AQTÓBE. KAZINFORM - &laquo;SNPS-Aktóbemunaıgaz&raquo; AQ-y suıytylǵan gaz tasymaldaýshylardan aldyn ala tólem talap etken. Bul buzýshylyqty Básekelestikti qorǵaý jáne damytý agenttiginiń Aqtóbe oblysy boıynsha departamenti tekserý kezinde anyqtady.</p>

Básekelestikti qorǵaý jáne damytý agenttiginiń Aqtóbe oblysy boıynsha departamenti «SNPS-Aktóbemunaıgaz» AQ-yna buzýshylyqtardy joıý týraly habarlama berdi. Alaıda iri munaı kompanııasy óz isin durys dep sanap, buzýshylyqty joıýǵa asyqpady. Keıin departament mamandary tekserý júrgizdi.

- Kompanııa suıytylǵan gazdy satý kezinde aldyn ala tólemdi talap etken jáne kúniburyn qarjy aýdarmaǵandarǵa suıytylǵan gaz satýdan bas tartqan. Birinshi ınstantsııa soty departamenttiń talabyn zańdy dep sanady. Biraq kompanııa sottyń sheshimimen kelispeı, apellıatsııalyq sotqa shaǵymdandy. Qazirgi kezde apellıatsııalyq sottyń sheshimin kútip otyrmyz. Aıta ketetin jaǵdaı, tergeý jumystary aıaqtalǵan kezden bastap, sot protsesteri shamamen 9 aıǵa sozylyp tur. Sonymen birge «Qazaqoıl Aqtóbe, «Gazprotsessıng» kompanııalaryna da habarlama berildi. Olar buzýshylyqty joıdy, - dedi Básekelestikti qorǵaý jáne damytý agenttiginiń Aqtóbe oblysy boıynsha departamentiniń basshysy Saǵyndyq Irgaleev.

Aıta keteıik, departament bólshek saýda naryǵyn da tekserdi. Sol kezde suıytylǵan gazdy shekti baǵadan asyryp satqan birqatar naryq sýbektisi anyqtaldy.

- Nátıjesinde Real gaz-ǵa 345 000, Forceoil-ǵa 1 242 000, «GazSnabZap» kompanııasy 241 500 teńge aıyppul salynyp, jazalandy. Bıyldan bastap suıytylǵan gazǵa shekti bólshek baǵany belgileý jáne baqylaý jónindegi atalǵan fýnktsııany QR Energetıka mınıstrligine berildi, - dedi Saǵyndyq Irgaleev.

Eske salsaq, bıyl jazda Aqtóbede suıytylǵan gaz tapshylyǵy sezildi.