Aqtóbede probatsııa qyzmetkerleri sottalǵan qarııanyń páteraqysyn tólep berdi
Aqtóbe oblysy boıynsha QAJ departamentine qarasty Aqtóbe qalasynyń Almaty aýdandyq probatsııa qyzmeti óz baqylaýyndaǵy qarııaǵa kómektesti. 63 jastaǵy qala turǵynynan balalary bas tartyp, ol jaldamaly páterge qonystanǵan. Sottalǵan qarııa qaladaǵy kópqabatty úılerdiń birinde zeınetaqysyn páteraqyǵa tólep, kún kórip keledi. Esepte turǵan qart ananyń jaǵdaıyn túsingen probatsııa qyzmeti oǵan qoldaý kórsetý maqsatynda óńirdegi «Dobrye rýkı» eriktiler tobymen birlesip, materıaldyq turǵyda qoldaý kórsetý maqsatynda páteraqysyn tólep, azyq-túlikpen jáne qajetti kıim-keshekpen qamtamasyz etti.
«Probatsııa esebinde turǵan zeınetkerge atalǵan qaıyrymdylyq is-sharasyn kórsetýdegi maqsatymyz - ony qoǵamǵa beıimdep, jaýapkershilikti sezinýge shaqyrý. Osy oraıda áleýmettik kómek berýge arnalǵan usynysymyzdy óńirdegi «Dobrye rýkı» eriktiler toby qoldady. Sottalǵan qarııa beliniń aýyratyndyǵyna shaǵymdanǵandyqtan, probatsııa qyzmetiniń ınspektorlary aldaǵy ýaqytta oǵan áleýmettik kómek kórsetý baǵytynda emhanaǵa aparyp, MRT-ǵa túsirip, múgedektigin rásimdeýge kómek beretin bolady. Jalpy kómekke muqtaj azamattarǵa qol ushyn sozý izgi istiń úlgisi dep bilemiz. Qalamyzdaǵy eriktiler tobymen birge jasalǵan eki jaqty memorandým aıasynda qıyn jaǵdaıǵa tap bolǵan sottalǵan azamattardyń qaıta qylmysqa barmaýy, aldyn alý úshin qaıyrymdylyq is- sharalaryn júıeli túrde uıymdastyrylady»,- deıdi Aqtóbe qalasynyń Almaty aýdandyq probatsııa qyzmetiniń bastyǵy Aıǵanym Almaǵambetova.
Qınalǵan kezinde qamqorlyqqa bólegen probatsııa qyzmetine jáne eriktiler tobyna rıza bolǵan sottalǵan qarııa, óz alǵysyn bildirdi.
«Meniń zeınetaqym tek páteraqy men kommýnaldyq qyzmetterdi tóleýge jetedi. Kúndelikti azyq- túlik pen kıim-keshekke aýyspaıdy. Osyny eskerip, únemi materıaldyq kómek kórsetip júrgen Aqtóbe qalasynyń Almaty aýdandyq probatsııa qyzmeti men «Dobrye rýkı» eriktiler tobyna alǵysymdy aıtamyn»,- deıdi 63 jastaǵy sottalǵan qarııa.