Aqtóbede partııa qyzmetkerleri jalǵan málimet bergen
Sheneýnikterdiń azamattarmen kezdeskileri kelmeıdi. Osy jáne ózge de ózekti máseleler búgin «Nur Otan» partııasynyń partııalyq baqylaý komıtetiniń otyrysynda talqylandy. Komıtet tóraǵasy Pavel Kazantsev áriptesterin formalızmnen arylyp, turǵyndardyń ótinishterine júrdim-bardym qaramaýǵa shaqyrdy.
«Azamattardyń ótinishine qulaq aspaıtyn depýtattarǵa «Nur Otan» partııasy shara qoldanady. Al turǵyndarmen jumys isteı almaıtyn nemese oǵan qulyqsyzdyq tanytqandardy partııa óz qatarynan shyǵarady. Turǵyndar óz máselelerin partııanyń aıaqasty qaldyrmaıtynyna, qoldan keletin barlyq kómekti kórsetetinine senimdi bolýy kerek. Sondyqtan, ótinishterdi sapaly qaraý – partııanyń árbir múshesiniń jeke jaýapkershiligi jáne oǵan partııa artyp otyrǵan úlken senim» - dedi Pavel Kazantsev.
Jıyn barysynda Májilis depýtaty Snejanna Imasheva memlekettik organ ókilderi men máslıhat depýtattary azamattardyń ótinishterin elemegen, basshylardyń ózderiniń ornyna orynbasarlaryn jibergen, al birqatar aýdandarda saılaýshylarmen bolmaǵan kezdesýdi ótti dep kórsetken faktilerdiń oryn alǵanyn aıtty.
«Partııanyń Alǵa aýdandyq fılıalynyń málimetinshe, oblystyq máslıhattyń depýtaty Ǵ.M.Latypov úsh qabyldaý aıasynda 3 adamdy qabyldaǵan. Alaıda, sol azamattarǵa arnaıy qońyraý shalyp teksergen kezde olardyń qabyldaýda bolmaǵany anyqtaldy. Bul Aqtóbe oblysy Alǵa aýdandyq fılıaly qyzmetkerleriniń kópe-kórineý jalǵan málimet bergenin kórsetedi» - dedi Snejanna Imasheva.
Komıtet múshesi Qazaqstanda barlyǵy 6,5 myńǵa jýyq aýyldyq eldi meken, al aımaqtarda 3 myńǵa tarta depýtat baryn tilge tıek etti. Onyń aıtýynsha, halyq qalaýlylary eldi mekenderge arnaıy baryp, kóshpeli qabyldaý ótkizýdi jıi «esten shyǵaryp» alady.
«Kóptegen eldi meken turǵyndary oblystyq jáne aýdandyq deńgeıdegi joǵary laýazymdy partııa múshelerin múldem kórmegen. Óz máselelerin sheshý úshin aýyl turǵyndary aýdan, oblys ortalyǵyna, keıde tipti astanaǵa at aryltyp, aqshasy men ýaqytyn shyǵyndap, ár esikti qaǵyp júıkesin tozdyrady. Ádette sol máseleler - jergilikti jerde sheshýge, túsindirýge bolatyn jaǵdaılar» - dep atap ótti Snejanna Imasheva
Sonymen qatar, komıtettiń jumys tobynyń aqparaty boıynsha, jergilikti atqarýshy organdardyń ókilderi azamattardyń máselelerin sheshýge salǵyrt qarap otyr.
«Partııanyń respýblıkalyq qoǵamdyq qabyldaýyna sońǵy 8 aıda túsken 6852 ótinishtiń 47 paıyzy jergilikti atqarýshy organdardyń quzyryna jiberilgen. Ózimiz kýá bolyp otyrǵandaı, memlekettik qyzmetkerler ózderine kelip túsken ótinishter boıynsha máseleni sheshpegendikten, azamattar «Nur Otan» partııasyna júginýge májbúr bolyp otyr», - dedi Snejana Imasheva.
Partııalyq baqylaý komıteti júrgizgen jumystardyń taldaý nátıjesi jergilikti atqarý organdar azamattardyń ótinishin qarastyrý tártibin jıi buzatynyn kórsetti. Der kezinde qarastyrylmaǵan ótinishter, atústi berilgen jaýaptar QR «Jeke jáne zańdy tulǵalardyń ótinishterin qaraý týraly» zańyn buzý bolyp tabylady. Máselen, jergilikti atqarýshy jáne basqa da memlekettik organdar azamattardyń ótinishterinde kóterilgen máselelerge jetkilikti deńgeıde mán bermeıdi, berilgen jaýaptarda naqtylyq joq. Ótinish berýshilerdi olardyń túsinigine aýyr zańdarǵa júginýge baǵyt beredi.
«Partııanyń azamattardyń ótinishterin qarastyrýǵa baılanysty uıymdastyrylǵan jumystarynda partııa músheleriniń tártibi men jaýapkershiligin arttyrý máselesi birneshe ret kóterilgen. Partııa basshylyǵy turǵyndardyń kótergen suraqtaryn der kezinde sheshý máselesine erekshe nazar aýdarý kerektigin aıtyp naqty tapsyrmalar berip otyr. Partııanyń qoǵamdyq qabyldaý bólmeleri – qazir bizdegi eń tıimdi mehanızm. Ony múlde nemese jetkilikti paıdalanbaý úlken olqylyqtarǵa ákelip soǵady. Sol úshin olarǵa biz búgin partııa tarapynan qatań shara qoldaný týraly sheshim qabyldap otyrmyz», - dedi Pavel Kazantsev.
Sonymen, partııalyq baqylaý komıteti otyrysynyń qorytyndysy boıynsha Aqtóbe, Qaraǵandy, jáne Mańǵystaý oblystaryndaǵy partııanyń aımaqtyq fılıaldary tóraǵalarynyń birinshi orynbasarlaryn, oblystyq máslıhattardaǵy «Nur Otan» partııasy fraktsııasynyń birqatar basshylaryna, aımaqtyq partııalyq baqylaý komıssııasynyń tóraǵalaryna, depýtattarǵa jáne basqalarǵa shara qoldaný týraly usynys berildi. Sonymen qatar, Partııalyq baqylaý komıteti Aqtóbe oblysy ákiminiń orynbasary Marat Toqjanovty partııalyq jaýapkershilikke tartýdy usyndy.