Aqtóbede para alǵan memlekettik qyzmetshi 5 jylǵa sottaldy

AQTÓBE. QazAqparat - Aqtóbe qalalyq sotynda Qylmystyq kodekstiń «Para alý» baby boıynsha aıyp taǵylǵan Berikqalı Mereıge qatysty sot úkimi shyqty, dep habarlaıdy QazAqparat tilshisi.

Búgin №2 Aqtóbe qalalyq sotyna memlekettik kirister departamentiniń qyzmetkerleri túgel shaqyryldy. Sebebi buǵan deıin Memlekettik kirister departamentiniń ekonomıkalyq tergeý qyzmeti basshysynyń mindetin atqarýshy Berikqalı Mereı 1,7 mıllıon teńge para alý ústinde ustalyp, sot aldynda jaýap berdi.

Aıyptaý qorytyndysyn oqyǵan Jánibek Tórebekovtiń aıtýynsha, 2016-2018 jyldar aralyǵynda oblystyq memlekettik kirister departamentiniń qyzmetkeri birneshe ret «MaksGazKompanı» JShS basshylyǵynan suıytylǵan gazdy zańsyz tasymaldaý deregi boıynsha jaýap alǵan. 2018 jyldyń maýsym aıynda Memlekettik kirister departamentiniń ekonomıkalyq tergeý qyzmeti basshysynyń mindetin atqarýshy B.Mereı isti ýaqyty ótip ketýine baılanysty jabýǵa bolatynyn, ol úshin arnaıy syıaqy qajet ekenin aıtady. 2018 jyldyń 11 shilde kúni saǵat 17:00-de B.Mereı gaz kompanııasynyń ókiline telefon shalady. Al 17:30-da B.Mereı 1,7 mıllıon teńge para alý ústinde ustaldy.

Sotta aıyptalýshy B.Mereı: «Meniń sońǵy sózim joq, eshteńe aıtpaımyn», - dedi. Sýdıa Temirjan Aldanov sottalýshynyń sońǵy sózinen soń úkim shyǵardy.

«Berikqalı Mereı Qylmystyq kodekstiń 366-baby boıynsha aıypty dep tanylyp, 5 jylǵa bas bostandyǵynan aıyrylsyn. Jazasyn qylmystyq atqarý júıesiniń qaýipsizdigi tómen mekemesinde ótesin», - dedi sýdıa T.Aldanov.

Sonymen qatar, sottalýshy ómir boıy memlekettik qyzmette jumys isteı almaıdy.

Sot úkimi kúshine engen joq.