Aqtóbede para alǵan mektep dırektory 18 mln teńge aıyppul tóleıdi

AQTÓBE. QazAqparat – Aqtóbe oblysy Shalqar aýdanynda mektep dırektory 600 myń teńge para alyp ustaldy. Ol endi 18 mln teńge aıyppul tóleıdi, dep habarlaıdy QazAqparat tilshisi.

Shalqar aýdandyq sotynda №6 mektep dırektory Jańabaı Mýsınge qatysty qylmystyq is qaraldy. Oǵan Qylmystyq kodekstiń «Para alý» baby boıynsha aıyp taǵyldy.

Іs materıalyna súıensek, mektep dırektory zerthanashy laýazymyna jumysqa ornalastyrý úshin tanysynan jalpy somasy 600 000 teńge kóleminde para alǵan. Sot otyrysynda sottalýshy óz kinásin tolyq moıyndady, ókinetinin aıtty.

«Sot shyn júrekten ókingenin, kinásin moıyndaǵanyn, qylmystyq quqyq buzýshylyqty ashýǵa belsendi túrde qatysqanyn, erikti túrde zalaldy ótegenin, balalaryn negizge alyp, muny qylmystyq jaýapkershilik pen jazasyn jeńildetetin mán-jaılar dep tanydy. Al qylmystyq jaýaptylyq pen jazany aýyrlatatyn mán-jaılar anyqtalǵan joq.

Sot úkimimen M. kináli dep tanylyp, oǵan ómir boıy memlekettik qyzmette qyzmet atqarý quqyǵynan aıyryla otyryp, paranyń 30 eselengen somasy mólsherinde, ıaǵnı, 18 000 000 teńge kóleminde aıyppul túrinde jaza taǵaıyndaldy. Sonymen qatar sot Aqtóbe oblysy bilim basqarmasynyń basshylyǵyna jeke qaýly shyǵaryldy. Sot úkimi zańdy kúshine engen joq», - dep habarlady Shalqar aýdandyq sotynyń baspasóz qyzmeti.